Mihringte hi a hu ho a awm a, hruaitu neia khawsa a, kan awmdan inrelbawlna pawh hruaitu in a rel tura duan kan ni. Chuvangin khawvel hun kal tawhah pawh lal nei zelin kan awm thin. Kaihruaitu kan ngai a ni. Amaherawhchu mihring finna leh khawvel ram lo thang chho zel chuan lal thuneihna hian hlimna leh muanna a thlen loh chin a tam em mai tiin lal chu thlan lal ni sela, hunbi neiin lal tur pawh chu thlang ila, mihringte tan a tha ber a ni tiin democracy a lo piang chhuak ta a ni.
Chutiang chuan khawvelah democracy ram chu a tam zawk kan lo ni ta a. Hruaitu neih a ngai a, thuneitu bik pawh awm a ngai tih chu khawvel pawm dan a ni ta. Hruaitu nihna chu a mipui zinga tupawhin dan fel tak hnuaiah chuh theih a lo ni ta a. Chutiang chuan ramin hruaitu an thlang a. Ram chhungah rorelna kengkawhtu hruaitu chuan pawl a nei a. Chu pawl pawh chuan ram hruaitu ni tura chuhtu tur a hruaitu an thlang thin bawk. Chu chu democracy hlawhtlinna pawh a lo ni ta reng a ni.
Kan ramah hian democracy kalphung zui ang reng si, zui tluantling mang si lo hian political party kan din a. Hruaitu nihna kan invuah chawp a. Thlan lal ni lo ta na na na chu an hruaitu an nihna kan pawm ziktluak leh mang si lo a. Chu chuan buaina tam tak a thlen thin a ni. Tunlaia party pakhat ZPM buaina pawh hi mumal lo taka inpawtkhawm a, a tua mah thuneihna tluantling inpe si lo, thunei ve ang reng si awmkhawm an nih vang ni berin a lang a. Han chhui han chhui ila a bul ber chu thuneihna inchuh, pakhat rorel pakhatin pawm bik chuang lo an ang ber mai. Hei hi inpawtkhawm chawpa mumal lo taka rorel vang a ni berin a lang. He party buaina pawh hi president mumal tak, thuneitu in a kaihhruaina hnuaia awm chu nise a thlen a rinawm loh a. An pawl structure mumal loh hrin pawh ti ila a sual tam pui lovang.
MNF leh Congress ah te hi chuan president in ro a rel ang pawm lo chu an chhuak nawlh mai a. Sawi zui tur a awm lem lo. ZPM ah erawh chuan treasurer in pawl lakah question a siam pawp ngam a. Hei hi a thuneihna a nih chiah leh chiah loh pawh an danah hian a awm mumal lo bawk. An kalphung fel lo hrethiam lo mipui tam tak rilru an tibuai a. An mumal theihna tur ni bera lang chu thuneihna sang tak nei president vat sela, chu chuan an harsatna hi a chingfel thei turah i ngai ang u.