Mizoram leh Manipur uaptu Indian Youth Congress (IYC) Secretary Sarifa Rehman chuan Manipur tual chhung buaina avanga relief camp-a awm te’n chhawmdawlna an dawng tha lo tih a sawi a. Mizoramin raltlante chhawmdawlna a pek leh a ngaihsaknaah erawh lawmawm a tih thu a sawi.
Nimin khan Congress Bhawan-ah thu thar thehdarhtute kawmin Sarifa Rehman chuan tun hnaia Manipur a tlawhna atangin relief camp-a awm tlangmi (tribal) te’n chhawm dawlna an dawng mu mal lo mai ni loin, Manipur sorkarin a ngaihsak lo hle tih a hriatchian thu a sawi a. “A bik takin hmeichhia, naupang, nu nau pawm leh nau pai te’n an mamawh ang chaw tha an dawng lo a mai ni loin, ngaihsak an hlawh lo hle a ni,” a ti.
Sarifa Rehman chuan, “Manipur tualchhung buaina titawp turin Manipur-a sorkar lai BJP party hian hmalakna pakhatna a nei lo a. Prime Minister Narendra Modi leh Union Home Minister Amit Shah te pawhin Manipur buainaa tribal te tawrhna hi an bengkhawn duh lo a, an hnung chhawn tlat a ni,” tia sawiin, Congress party erawh chuan chhawmdawl ngaite chhawmdawl zel turin hma an lak zel tur thu leh Imphal paltlangin Manipur tlawh leh an tum thu a sawi a. Mizoram mipuite’n Manipur lama harsatna tawkte an ngaihsak leh an lo dawnsawn danah lawmawm a tih thu a sawi bawk.
IYC Secretary chuan an sorkar tirhin Prime Minister hian hmachhak state ralmuanna leh hmasawnna tiama a lo ai tawhna a thleng mai ni loin, kum kua (9) an sorkar tawh chhung hian hma lam pan loin India hi a hnungtawlh zawngin an hruai zawk tih a sawi.
Sarifa Rehman chuan zawhna chhangin, Manipur buaina chingfel tur chuan tribal leh tlangmi te hian dawhkan khat kila sawihona an neih a that ber a rin thu a sawi a. Tun dinhmunah erawh remna leh muanna a awm theihna’n Presidents’ Rule a Manipur dah hi tul a tih thu a sawi bawk.
Sarifa Rehman chuan IYC-in India ram puma thalaite inrawnkhawmna lian leh pui ber tur ‘Behtar Bharat Ki Buniyaad’ chu Bengaluru-ah July 10-12, 2023 chhung hian an buatsaih dawn tih a sawi a. He hunah hian thil man sang zel chungchangte, hnathawh tur vang avanga thalaite’n harsatna an tawh dan te, ram chhungah hna hmu lo an pun zel dan te leh India thalaite tana hmasawnna leh intodelhna tura hmalak dan tur hrang hrangte sawi hona neih a ni dawn tih a sawi.