Aizawl: June 19, 2023 khan Indian Youth Congress (IYC) leh MPYCC tangkawp chuan Rahul Gandhi piancham pualin Manipur buai avanga Zohnahthlak relief camp-a awm mekte tanpuina an hlan.
Tanpuina hi Churachanpur chhunga relief camp atana hman pahnih Don Bosco Higher Secondary School leh Churachandpur College-ah te hlan a ni. IYC leh MPYCC Relief Team-te hian chhawmdawlna an ken tam zawk chu Manipur Pradesh Congress Committee hruaitute kutah hlanin, Manipur Pradesh Congress Committee hruaitute hian ruahmanna fel tak siamin relief camp hrang hrangah an sem darh ang.
MPYCC General Secretary HP Lalchuailova chuan Myanmar leh Bangladesh atangin raltlan eng emaw zat Mizorama an awm mek laiin, Manipur-a Zohnahthlak unaute’n an duh loh leh mang lam pawha an la man chhin ngai loh harsatna an tuar chu an tuilian thlir mai mai lo tih sawiin, “Mi tam takin nunna kan chan tawh a, Biak In tam tak an hal chhe tawh bawk, chenna in tam tak hal chhiat a ni bawk a, he in tawrhna zawng zawng hi kan tawrhna a ni,” a ti a. Mizoram lama ral tlante leh Manipur relief camp-a awm mekte tan hian MPYCC chuan theih tawpin hma an la chhunzawm zel dawn tih a sawi.
MPYCC-in an tar lan danin, tun din hmunah Churachandpur huam chhungah relief camp 107 a awm mek a, mi 40,000 chuang relief camp hrang hrangah hian an khawsa mek. IYC leh MPYCC-te hian he’ng relief camp-a awm hmeichhia leh naupang kum tling lo te bakah nu hnute hne lai mekte tana tangkai tur thahnem tak leh damdawi chi hrang hrang eng emaw zat an hlan.
Manipur-a Zohnahthlak relief camp-a awm mekte chhawmdawlna pe tur hian IYC Secretary Mizoram & Manipur In-charge Sarifa Rehman bakah MPYCC hruaitu engemawzat an kal a ni.