Mizorama rorel lai, MNF party-a nomination committee chu tun hnaiah an thukhawm fo a, bial 40-a ding turte erawh an la thlang fel lo. Hetihlai hian minister ni mek pakhatin MLA inthlanah din tawh lo mai a hreh lo thu committee-ah a thlen nia thudawn a ni.
MNF party nomination committee-ah hian chairman chu an president, Zoramthanga niin member 11 dang an awm a. Tun thlaah tum hnih an thukhawm tawh a, bial thenkhata ding tur an tihfel nual tawh laiin bial zawng zawnga chuh tur erawh an la thlang fel lo thung.
June 7 khan Chief Minister Office-ah an thukhawm a, Thawhtanni khan an thukhawm leh a. The Zozam Times thudawnna chuan, candidate tur ruat chungchangah hian nomination committee hi an inlungrual tlang rih hle a, bial 40-a ding tur an tihfel hun tur erawh a la sawi theih loh niin a sawi.
Tun thla tira an thutkhawm tuk khan nomination committee chairman, president ni bawk, Zorama’n candidate tur an tihchian tawh zinga mi, Robert Romawia Royte chu Hachhek bialah a ding dawn tih a puang.
Hetihlai hian Cabinet Minister Lalchamliana chuan a kumte a tam tawh avangin candidate-ah ruat lo mah se a pawm thu nomination committee hruaitute hnenah tawngkain a thlen niin thudawn a ni.
Hemi chungchanga zawhna chhangin Lalchamliana chuan, thangthar zawkte a ken theih tawh thu hi tawngkain a thlen a, ziak erawh chuan a thlen hran lo tih a sawi.
MNF party hian MLA bial 40 awmah MLA 25 an nei mek a, MLA ni laite hi chu la ding leh vek turah ngaih an ni a. Hemi chungchang hi nomination committee hruaitute zawh an ni a, anni chuan MLA an neih sate din leh vek tur leh tur loh hi an sawi theih rih lo thuin an chhang thung.