Maharashtra khawpui, Mumbai-a police-ten vaccine camp lem kalpui an hai chhuahah mi 10 an man a, he camp-ah hian mi 2,000 dawn an chiu hman an ni.
Police-ten FIR pasarih an ziak lut a, mi 10 an man zingah vaccine certificate siamna atana mi dang hnena CoWIN account username leh password pe darhtu hmeichhia a tel.
“An pawikhawihna hmanga pawisa nuai 12.40 an lo dawn tawhte chu hmuh let vek a ni tawh a. Mawhphurtu langsar pahnih, Manish Tripathi leh Mahendra Singh-a te bank account chu khawih chet phal lohvin dah nghal a ni,” tiin Vishwas Nangre Patil, Joint Commissioner of Police (Law & Order) chuan a sawi.
“An camp siam pariat hriat chhuah belh a ni a, rinhlelh mite hi a ngai deuh vek an ni,” a ti bawk.
Vaccine la hmante chuan camp kalpuitute hian Gujarat atangin Covishield an nei nia an insawi thu an sawi a. An vaccine hi a tak nge a lem tih hriat theih a ni rih lo.
Covishield siamtu, Serum Institute chuan Brihanmumbai Municipal Corporation hnenah lehkha a thawn nghal a, tuna a la bâng an mante chu engtik laia pek chhuah nge tih leh tute hnena pek chhuah tura chhinchhiah nge a nih anmahni lam atangin an enfiah dawn tih an hrilh.
Hetianga invenna pekna lem siam hi kar kaltaa Mumbai Kandivali housing society-in hekna an thehluh atanga a hriat tan a ni.
Hiranandani Heritage Residents Welfare Association (HHRWA) chuan private damdawi in atanga kal anga insawi, hetiang camp buatsaihtuten an member thenkhatte an bum niin an sawi.
Film producer Ramesh Taurani pawhin a hnuaia thawk mi 635-te tana May 30 leh June 3 inkara vaccine camp buatsaihah an mi kohte atanga vaccine certificate an la dawn loh vangin inbumna nia ngaiin hekna a thehlut bawk.
Kolkata-ah pawh camp lem hi buatsaih a ni tawh bawk a, mi 2,000 vel bum an lo ni tawh.
Bombay High Court chuan Brihanmumbai Municipal Corporation hnenah heng vaccine lo dawng tawhte hi chhuichhuaka an hriselna endik turin a hriattir a. Vaccine an mante chu a tak a nih leh nih loh finfiah tur leh a lem a nih chuan vaccine tak tak pe nghal vek turin a hriattir bawk.
Hei bakah hian hetiang inbumna a thlen tawh lohna turin private vaccination camp buatsaih dawn reng rengin inkaihhruaina mumal taka siam tawh turin a hriattir a. Tuna an mante chet dan hi sorkarin chhui chhuak vata Epidemic Diseases Act hnuaia dan hmanga hrem thuai an nih theihna atan an chhui chianna thehlut vat turin a hriattir bawk.