Czech Republic chhimchhak lam khaw eng emaw zat chu tornado-in a nuai a, mi pali thiin mi 100 velin hliam an tuar niin chhanchhuah hna thawktuten an sawi.
Ningania thli na tak thawk hian chhim lama Breclav leh Hodonin district nuaiin chenna in chung tam tak a hawk a, thing kung a tlu a, car tam tak a chhem leng bawk.
A hmuna awmten thlalak leh video an thehdarhah chuan indona hmun ang maiin a tuar na zual hmunte chu a lang.
“Hremhmun ang mai a ni,” tiin South Moravia regional governor Jan Grolich chuan chhiatna thlenna hmun a tlawh hnuah a sawi.
An ram chhung hmun hrang hrang atangin chhanchhuah hna thawktute an thawh chhuah bakah an thenawm, Austria leh Slovakia atang pawhin an pui.
South Moravian rescue service thupuangtu, Michaela Bothová chuan mi 63 zet damdawi inah dah luh an nih thu a sawi a, an zinga mi paruk chu an na hle tih Czech TV hnenah a sawi a. A hnuah mi pathum an thi.
Chhanchhuah hna thawhtute damdawi ina an dah bakah mi eng emaw zatin anmahniin an pan bawk tih a sawi a. In chim leh chhe karah thi leh hliam dang an la awm a ring bawk.
Hrusky khaw zahve zet chu a chhia niin an khaw deputy mayor Marek Babisz chuan a sawi niin tual chhung chanchinbuten an sawi.
“Biak in chhip zum a awm tawh lo va, elementary school-in chung a nei tawh lo va, in thenkhat phei chu a bang chauh a awm tawh a ni,” tiin Czech public radio hnenah a sawi.
Tornado leh rial nasa tak tlain ramri bula Hodonin khua a nuai bawk a, tarte awm khawmna in leh an sahuanin a tuar nasa hle.
Hodonin damdawi in director Antonin Tesarik chuan indona hmun ang mai a nih thu a sawi a, mi 200 vel lai hliam an awm mai thei niin a sawi.
“Chhiatna rapthlak tak a ni a. Hmun tinah thisen a awm a, tanpuitu nei lo tam tak mittui nen an awm a. Thliin an in chung a la a, an him hram hlawm a ni,” tiin a sawi niin CTK news agency chuan a tar lang.
Tornado avang hian lirthei kal vel leh power pekna pawh a tibuai hle a, kawngpui lianah lirthei a kal thei lo va, chenna in 1,00,000 chuangin zankhuain electric an nei lo bawk.
Czech Interior Minister Jan Hamacek chuan an dinhmun chu a tha lo tih a sawi a, chhanchhuah hna thawk thei chi apiang tirh luh an nih thu a sawi.
Minister hian chhiatna thlenna hmun a tlawh tawh a, emergency a puang.