China-a martial arts school-a kangmei nasa tak chhuakah mi 18 vel an thi a, mi dang 16 velin hliam an tuar bawk niin tualchhung chanchinbuten an tar lang a. Thi leh hliam tam zawk hi naupang an ni.
Henan province-a Zhenxing Martial Arts Centre-a kangmei chhuaka thite hi zirlai naupang, kum sarih leh 16 inkar an ni deuh ber.
Kangmei hi nimin tuka chhuak niin tam tak chu an tlanchhuak thei niin tual chhung thuneituten an sawi a, a kan chhan hi an la hre lo.
China-ah hian kangmei chhuak hi thil thleng fo thin a ni a, kangmei laka himna lam erawh ngaihthah a ni thin thung.
Tun tuma kangmei chhuahna martial arts centre enkawltu (incharge) chu man nghal a ni tih Zhecheng county government thupuangtu chuan WeChat channel-ah a tar lang.
Sorkar thuneitute chuan centre-ah hian zirlai 34 an awm a, kangmei hi an ram sanaa zing dar 3:00 (India-a zanlai dar 12:00) vela chhuak a nih thu Beiing Toutiao News hnenah an sawi.
Hliam tuar zirlaite chu tual chhung damdawi inah hruai nghal an ni a. News agency Reuters hnenah zirlai nu leh pate chuan engmah chanchin hrilh an nih loh thu leh an fate hi hmuh pawh phalsak an nih loh thu an sawi.
“Zhenxing-ah hian naupangte hian martial arts hi an zir a, an cheng nghal mai zel a. Engati nge kangmei hi a chhuah theih ka hre lo,” tiin naupang dam chhuak, kum kua mi pa chuan a sawi.
Nu leh pa dangte chuan information zawng zawng danchah vek a nih thu Reuters hnenah an sawi bawk.