Aizawl : MNF Adviser Lalruatkima’n “Sorkar thaa kan hmuh thin hrang hrang MNF sorkar hnuaiah kan hmu mek” a ti.
Aizawl West II bialtu, Minister ni bawk Lalruatkima chuan kar kalta Zirtawpnia a bial Tuikual North-a MNF-a mithar a lawmluhnaah he thu hi a sawi a. “Gas kan hnianghnar a, veng thenkhatah phei chuan home delivery kalpui tan a ni” tiin, “Gas changa tlaivar dawn dawna intlar a bo ta a. Ration buhfai te a lo tha ta em em a, retailer-a awm thin, a tha thlanna te pawh neih a ngai ta lo hial” a ti.
Tui leh electric pawh a pangngai ta hle niin Lalruatkima chuan a sawi a. “Kan kawngpui te pawh nasa takin a lo tha ta a, a chhe lai la awm te pawh siam mek avanga chhiate a ni deuh chauh a ni” a ti a. Zirna kawngah pawh hma kan sawn nia sawiin, “raltlante thlengin zirna kan pe a ni” a ti.
Lalruatkima chuan “Health care lamah nasa takin hma kan sawn” tiin, thalaite hmakhaw ngaihtuah kawngah pawh hmalakna chhuanawm tak tak hmuh tur a awm niin a sawi.
MNF Adviser chuan, Covid-19 avanga harsatnate, ramri buai leh a nghawng harsatnate, Vawk pul hri leng, helicopter-a telh hial ngai hial ramkang leh lirnghing te bakah raltlan buaipui ngai te an awm chungin sorkar, kohhran leh tlawmngai pawl tanghona Pathianin mal a sawm niin a sawi a. “Hun harsaa min hruaitu Pathian hian he sorkar hi hun thawl tha zawk, Zoram khawvel thar din tur hian remchanna min pe leh ngei ang tih ka ring a ni,” a ti bawk.
ZPM chungchang sawiin, Lalruatkima chuan “ZPM boruak a kang chho viau a, bial viltu an han insiam a, an hniam rawih rawih a. An chhungkua a keh nasa em em a, a kehchhe vek lovang tih sawi har khawpin an chhungrilah an buai” a ti a. “An danbu-in nomination committee-a tel ngei tura a tih an elected OB pathum lai an thlim a, an party Treasurer-in an party chu show cause notice a pek ngai khawp party an ni ta mai hi a zahthlak hle” a ti.
ZPM chu an chhungkua an buai tak em avangin neutral rin an kai ta lo nia sawiin, “anmahni ngei pawh an inring tawn tawh lo” Lalruatkima chuan a ti a. “Congress ni se, an Treasurer a bang a, an bang ta sup sup a, an boruak a hniam em em bawk a ni,” a ti bawk.