Tripura-a rorel lai, BJP leh eptu, CPI (M) party mite hmun hrang hranga an intihbuainaah mi 30 chuangin hliam an tuar.
Buaina hi CPI(M)-in thil hrang hrang 12 tihhlawhtlin duha state puma thil an nawrna atanga chhuak a ni.
Hliam tuar tam berna hi South Tripura district-a Rupaichari-ah a ni.
Police-ten intualvuakna hrang hranga tel mi 100 chuang an man tawh a, an zingah hian hliam tuar mi 12 pawh an tel a. mi 7 chu CPI(M) mi niin BJP mi 5 an tel bawk.
Police-te hian Section 151 bawhchhiah mi 4,600 an man tawh bawk a, thubuai ziah luh erawh a la awm lo.
CPI(M) state secretary Goutam Das chuan thuthar lakhawmtute a kawmnaah an party mite chu BJP-in hmun tam takah an bei tih sawiin police chet dan duh lohna leh demna hi lantir an tum tih a sawi.
BJP thupuangtu, Nabendu Bhattacharya chuan BJP worker mi 5 chuan hliam an tawrh thu leh damdawi inah enkawl mek an nih thu a sawi.
Bhattacharya hian buaina chhuak hi CPI(M)-in an ruahman saa thleng a nih thu a sawi ve bawk a. “Kan party mi 12-in hliam an tuar a, thenkhat erawh damdawi in kalpui hnua chhuah lehnghal an ni a. Mi 5 erawh an nat deuh avangin damdawi inah an la awm,” tiin Bhattacharya hian a sawi.