Split decision-in Lalruatmawia’n Abednego VL Dinpuia, Samuel Zadeng chuan Vanlalhriata an hneh a, a vawi khat nan title fight-a inlan turin Thawhlehni zan Mizoram Labour Link LPS Pro Fight-ah hnehna chhinchhiahtlak tak an chang.
- LIGHT
LPS Arena, Falkland-ah inhnial theih takin Chhiahtlang boxer Ruatmawia a chak a, a la tawn ngai loh hun ropui hmang zui thei turin title chuh tur zawnna final an paltlang.
Lightweight-ah Lalkhawngaiha kawl lai champion kawnghren laksak tumin boxer 61 an tel a, seed pek pariat awmin amah cho thei tur zawnna hnuhnung berah seed sang parukna, Ruatmawia’n a tir atangin seed sang pathumna, Dinpuia nawr tluan mah se inhnek a thunun thei bik lo va. Round li an inbeih hnuah judge pahnihin 39-38, 39-37-in Chhiahtlang diesel engine an chaktir a, pakhatin 39-37-in Dinpuia a pe hnem a ni.
Inhnek an tan rualin Sairang Sihhmui rawltharin nalh takin amah nawrtu Ruatmawia a hnek let a, a hnuai leh chungah dik taka a hnek bakah vawi li hnek zawn chang a nei bawk a. Kum 23 mi, Ruatmawia’n nawr tluanin tharum leh thahrui a nei tha a, a ding lam a vai chhuah leh thui taka a hnek hmangin lehlam a tibuai ve thung.
Ruatmawia’n hma lam pan chungin a hnek chhuak hnem a, langsar taka hnek fuh a neih rualin lang tham vak lovin a taksaah a hnek tel a, vawi li hnek zawn chang a nei a. Kum 18 mi, Dinpuia’n a vei lamin a dawm hnem a, round hnuhnungah inveng chhungin dik leh dak tha takin a hnek a, a tawp hma chiahin inhnaih chilhah a kut a rangin fuh takin a hnek a, round lina la zawk mah se inhnehtawk takin a chak zo lo.
Kum 2024 khan semifinal-ah Ruatmawia’n split decision-in Venghlui boxer Khawngaiha a hneh lo a, tun kum hnih chhungin thiamna kawngah a intuai hriam nasa a. Zirtawpni zanah a tlawmna chhan let tumin Khawngaiha nen champion kawnghren an inchuh dawn.
- MIDDLE
Kum 19 mi, Samuel-a’n hnek thui zawk a nihna a chhawr zui leh a, Hriata lakah judge pahnihin 39-38, 39-38-in an chaktir a, pakhatin 39-37-in lehlam pe tam mah se a tlang hram.
An pahnihin boxer langsar zawk hneh chho zelin champion lai, F Lalthanliana Junior hmaa ding tur zawnna final-ah an intawng a. Feet 6 leh inchi 1-a sang, Samuel-a’n a ban phak atangin hnek chungin seed sang ber dawttu, Lalruatzela Hauzela leh seed sang pathumna, Frank H Vanlalruatpuia a hneh a. College Veng fighter Hriata’n seed sang ber, C Lalhruaitluanga leh seed sang palina, PC Remruatdiak a nawr hneh ve thung.
Inchi li leh a chanvea hniam zawk, Hriata’n panin a ngilin a hnek chhuak zawn a, veikhawr Samuel-a’n tlawh chungin a lo hnek a, a ngila a vei lam a hnek chhuahin awmzia a nei a. Lehlam kut karah Hriata’n nawr tlangin a vei leh ding fuh taka a chhuah zawn thin bakah lang thama hnek fuh a nei fo a, chutih rualin inhnek tawnah Bawngkawn West kut a rang ve thung.
Round hnihna atangin a tirah Samuel-a’n vawi 10 vel a hnek zawn ziah a, chhang let lovin lehlam a inveng ringawt a, ven sen loh chian a nei a. Hma lam pan chunga Hriata khelh danin mipui lawm a hlawh a, thui taka a hnek chhuahin awmzia a nei a, Samuel-a’n a ban phak atanga a hnek fuh thin bakah lehlamin a ven loh a taksaah a hnek fo bawk.
Pro Fight-a a tel vawi khatnaah Bawngkawn West rawltharin title a chuh nghal dawn a, amah aia hniam vek bitumin hnek thui zawkna a nihna a hmang thei zel a, title fight-ah pawh ban sei zawk ni chungin Thanliana a hmachhawn leh dawn a ni.
- FLY
Kum hnih kal taa a hneh loh, Lalrinngheta nena intawng leh turin Vanlalenkawltira’n hun tha a insiam a, flyweight title chuh tur zawnna final-ah Moses Lalruatfela a hneh.
Venghlui boxer-in chak ngei a duhzia lantirin championship kal meka a khelh that ber hun a hmang a, a tir atanga a tawp thlenga inveng chunga tawlh kual tluan chhuak zak, Ruatfela lakah unanimous decision-in a chak a, 39-37, 39-37, 39-38-in judge pathum point pekah a chungnung vek.
Kum 23 mi, Enkawla hian Orient Goldsmith Fighter of the Night lawmman a dawng a, hmabak hlen tur nei chungin hruihrual chhung a chhuahsan a. Pro Fight hnuhnung ber, kum 2024 khan title fight-ah Tuipui boxer Rinngheta a hneh lo va, 2023 title fight-ah NT Lalbiakkima a hneh lo bawk a, Zirtawpni zanah Rinngheta kawnghren kawl lai chhuhsak tumin a vawi thum nan flyweight title fight-ah inlan ang.
A tir atanga a tawp thlengin Enkawla’n Lawngtlai Vengpui boxer a um a, vawi thum vawi li hnek chhuah zawn hnuah lehlam a petek zel a, round hmasa berah an inhnek fuh tam lo. Hnek thui zawk, Ruatfela’n tawlh kual chungin a hnek a, a hnaih rei duh lo va, tha taka hnek chang nei mah se Enkawla’n englai pawhin a um a, hneh chhuak hnem zawk a nih avangin lehlam a inveng seng lo.
Enkawla’n thahrui nei tha zawk a nihna lantir telin nuam ti takin a khel a, round thumna atangin a nawr hneh leh zual a. Kum 20 mi, Ruatfela’n huaisen takin hnek let ngam se, ban sei zawk a nih bakah a kut chhuak a ran ve tho avangin hun tha a nei zawk mai thei.