Luka Modric chuan Real Madrid-ah kum khat dang cham turin contract pawhseina a ziak.
Kum 37 mi ni tawh Croatia international hian kum 2012 khan Real Madrid hi a zawm a, an hnena kum 11 a cham chhungin trophy 23 a la tawh.
Modric hian Madrid-ah cham chhunzawm a duh thu a lo sawi tawh thin a. Tunhnaiah Saudi Arabia atangin sum tam tham tak hlawh tura sawmna dawng mahse Spain a inkhelh chhunzawm a thlang.
Tun season lo awm turah Madrid starting line up-ah Toni Kroos, Jude Bellingham, Eduardo Camavinga, Aurelien Tchouameni, Federico Valverde leh Dani Ceballos te nen an inel dawn a ni.
Season liamta khan La Liga leh UEFA Champions League-ah vawi 43 a inlan a, Carlo Ancelotti hnuaiah player pawimawh a la ni reng.
Ancelotti hian tun season-ah erawh player naupang zawkten an khelh tam tur thu a sawi a. Modric leh Kroos te rim lo zawka chhawr an ni dawn niin a sawi.
Real Madrid tan hian vawi 488 inkhel tawhin goal 37 a khung tawh bakah midang khung tur vawi 77 a siamsak tawh.