Tuichangral head coach David Aizampuia Fanai chuan Thutak Nunpuitu Team laka an tlawmna chhang let turin hun tha an nei niin a hria a, Tata SK 712 Pro Volleyball League semifinal-ah an intawng dawn.
Zaninah R Dengthuama Indoor Stadium, Mualpuiah a vawi hnih nan final luh tumin Tuichangralin theihtawp an chhuah dawn a; league-a an inkhelh tawhah TNT ngam lo viau mahse thil pahnihah hma an sawn phawt chuan an chak theih a beisei.
June 12 khan vawi nga an deuce hnuah Tuichangralin 30-28-in set hmasa ber an la na a, tunlaia team khawng leh inpumkhat tha ber TNT-in nawr letin set thum an la zawn zui a ni.
David Fanai chuan, “Kan inkhel kha ngun takin ka ennawn a, net bulah kan vuak dang turin ban an phar taimain a phui bik hle a, vuak leh ball ber an la thei zawk hle bawk.”
“Ball vuak hrim hrimah an tha bik lo. Mahse, ‘block leh defence’-ah kan tluk lo va, insiam thata hmasawn ngei turin theihtawp kan chhuah dawn a ni.” a ti.
Aizawl pawn atanga Pro Volleyball-a tel hmasa ber Tuichangral hian season khat an hmanna 2018-ah final an lut a, an hmaah fiahna hautak TNT a awm a, a vawi hnih nan final luh ngei tumin an inbuatsaih.
An khelh hnuhnun berah 3-2-in Tuipuiral an hneh hram a, league-ah palina ni chungin knockout round an lut. Mizo hlanga champion hmasa ber nih tumin TNT-in an bitum an hneh fai vek ve thung.
Tuipuiral nen an inkhelh laiin Tuichangral rinrawl Saidingpuia Sailo chuan a ke a tina a, Hunthar nen an inkhelh tumin hliam vangin hun pawimawhah lak chhuah a ni tawh bawk.
David Fanai chuan, “Tha tawm vangin harsatna a tawk thin a, ruh khawiha hliam na tak a ni lo. A khelh theih ngei kan ring,” a ti a, vawi nga an khelh tawhah Saitea’n point 84 thawk chhuakin 50 a hloh.
Tuipuiral nen an inkhelh lai thovin setter Hmangaihthanga a thlak a, Lalrinchhana hmangin set hnuhnung pahnih an la zawn. Mahse, an khelh dan pangngaiin Hmangaiha tho an hmang zui leh ang.
Tuichangral tan Haryana atanga an lak luh Vinod Khatkar chuan point 124 hlawh tawh mah se vawi hnih chiah an la chak a, 57 a hloh. Ball vuakah an chhe lo va, Saitea bakah danglamna siam tura rin ngham Lalhmunmawia’n point 20 hloh tawhin 60 a hmu tling ve thung.
Pro Volleyball hmasa ber 2016 khan league-ah TNT an sang ber a, rin hlawh tak ni chungin final-ah an chak zo lo. Nikumah knockout round lut team pali zingah an hniam ber a, semifinal-ah league-a chak vek Hunthar lehthalin a vawi hnih nan final an lut.
2022-a Hunthar dinhmun ang kha tawng mekin rin hlawh ni chunga an khelh dawn avangin boruak rit takin a delh tel a; chutih laiin TNT hian nikuma an player-te vek hmang chungin kuminah hma an sawnzia an lantir mek.
Superstar Vanlaltanchhana’n point 118 vaw chhuakin 34 a paih a, Tuichangral an hneh tumin tum 31 vaw tlain vawi nga chiah a tisual. A pum puiah player tha ber ang hiala ngaih mek a ni a, D3 Business Player of the Match-ah tum li thlan a ni tawh.
Tuipuiral an hneh tumin TNT tichaktu pawimawh Zosangzuala leh Laldinchhunga an awl a, vawi li ve ve an khelhah point 40 chuang ve ve an thawk chhuak a; team inkhairual tak an nih avangin sut an harsa a, Sadraka Fanai chuan point 42 a thawk chhuak tawh bawk.
Net bula lehlam vuak dan kawngah TNT an tha a, Zosangzuala leh Sadraka’n an thawh hlawk. Chutih laia an team tinunga tichaktu pawimawh tak chu setter Lalliankima a ni a, Tlangsam player hian a nupui raipuar teuh tawh a kalsan.
An khelh hmasak berah Durtlang North hneha hlim taka hun an hman laiin a nupuiin fa a hrinsak a, hmu ve thei rih lovin TNT tan hmabak pawimawh ber hlen tumin a insawrbing zui zel a ni.