Film sawihlawh leh hit, ‘The Kerala Story’ chuan OTT (Netflix, Hotstar etc.) lamah leitu a hmu zo lova, film industry pumpui ang zawnga rahbehna a tawng mek nia hriat a ni.
He film hi May thlaa tlangzarh a nih khan kiltin mai atangin beihna a tawk zut zut nghal a, tunah hian OTT platform lamah hralh duh hle mah se, leitu tur an hmu thei lova, a phenah dangbuaitu an intelkhawm.
Film director Sudipto Sen, “Box office lama kan hlawhtlinna kha film industry-a section thahnem tak tak tan thiktham a ni tlat mai a, kan hlawhtlinna vanga hremna tawkah kan inngai mai,” a ti.
ISIS leh Kerala-a tihluihna hmanga sakhuaa inleh luih tirna thleng chungchang tarlan a ni a, West Bengal-in state chhunga chhuah a khap bur hnu lawkah Tamil Nadu-in a zui ve nghal bawk a, Dan leh thupek kenkawh harsat rinna vangin an chhuah ngam lo a ni ber.
Hetih lai hian, BJP rorelna state- Madhya Pradesh, Uttar Pradesh, Uttarakhand leh Haryana ah te chuan tax-free sakin, zalen takin an chhuah.