India rama enthlatu pawl lian ber Research and Analysis Wing (RAW) hotu hlui chuan film lar tak, ‘Pathaan’ leh ‘Tiger’ franchise te chu a tak ram nen inpersan tak a nih thu a sawi.
Vikram Sood-a’n SRK channa, ‘Pathaan’ hi kumina film hit ber niin, box office-ah cheng vaibelchhe 1000 chuang lalut mah se, spy movies pangngai ve tak, spy awmdan leh landan phochhuak pha si lo a nih vanga en tumna pawh a neih loh thu leh a ngaihven lo hle, a ti bawk.
A sawi zelnaah film siamtute’n spy film an siam hian thinlung tak tak nena siam an awm lova, a tak ram nen inhlat tak an nih thin avangin tun aia hmasawn tum se a duh thu uar takin a sawi.
Bollywood film siamtute’n a tirah James Bond film ang deuh tura buaipuiin, inpersan lutuk siin an chhuah lehlawi thin a, ISI hmeichhe lam an siam leh RAW agent hlim taka hun a hman tak thu tarlanna te chu a tak rama awm ngai lo leh thil thleng thei pawha a rin loh thu a sawi.
Hetih lai hian Salman Khan channa, ‘Ek Tha Tiger’ chungchangah erawh a rilru a insual angreng hle a, a ngaihdan a phir. ‘Bajrangi Bhaijaan’ erawh chu an ti lutuk mah mah, a ti a. Spy film dik tak en duh tan Steven Spielberg siam, ‘Bridge of Spies’ en ngei turin thurawn a pe a, thil a nihna dik tak lantirin a awm a, a tawpa nun khawhar tak a hmanchhoh dan tarlan niin, spy film dik takah a pawm hmiah.