LALRENGPUII ka hmelhriatna chu Whatsapp group pakhat member 20 vel lek awmna atangin a ni a, hmeltha ka tiin, a Dp vawikhat ka hmuh atangin ka vei nghal tlat mai a. Ka belchiang a, a fing a, a tawngkam a felfai thlap a, thenrual kawm pawh a thiam tih ka hre nghal mai a. Naupangchhia lutuk chu a ni tawh bik lo tawp ang.
Henu hriatchian ka duhna chuan min bual â hneh khawp mai.!!
Kei hi doctor zirchhuak hlim niin Aizawl veng pakhatah kan awm a, keini ang rual hmelchhe em em lo. A hminga doctor lo ni ve ta chu nula lamah pawh ka luck ang reng hle a, duh duh thing thei chu intingam chiah lo mah ila hetiang lamah chuan rual ka pawl ve hle ti mai ang.
Nula hmeltha tak tak kawp tur hi an awm ve fur thin mai a, tawngkam pawh hian ka ler thiam thei fu a ni. Mahse, ka thinlungah kha nula, ka hriatchian em em si lo leh hriatchian ka chak ni bawk si LALRENGPUII chuan hmun tam tak luahin ka thinlung kawngkhar chu a rawn su hawng hneh kher mai.!
Kan inbe tam telh telh a, ka duh tulh tulh a, ka thikthu lah a chhe tulh tulh a, ka nawr zim tulh tulh a, nupuia neih hial ka duh ta mai a!!
Amah pawn min duhin, min hmangaih ve viau tawhin ka inhria a.
Hetih lai hian hmeichhe pakhat kawplai ang reng deuh, ngaihzawng ni chiah si lo ka nei a, mi hausa fanu, phaia college kal niin, hmeltha tak, a boruak tawn azira Zu pawh in ve mai thei chi ka nei bawk a, hei erawh ka thianpa chauhin min hriatpui thung.
LALRENGPUII nen chuan hun leh ni chhiarin inneih hial te kan tum ta a, kan inhmuh changte hian zuamawm leh nep tak hian a awm ngai lo.
Zahawm takin, fel thlarh hian a awm a, kan inah pawh vawi tam chu ka hruai tawh a, ka nu nen phei chuan an inngaina tawh ang reng hle a ni.
Hun a liam zel a, kan induhna leh Hmangaihna chu thup rual lovin a parchhuak a, tunah chuan inneih hial kan tum ta.
Kan chungah hian eng nge lo thleng dawn tih tuman kan hre si lo. Hre lawk ni ila, hringnun hi a ngai angin ka chelh ding reng thin ang.
LALRENGPUII Chu ka nupui a ni ta.!!
Ka hlimna leh lawmna hian tawp chin a nei lova, Ka Nupui chu ka atchilhin ka duh em em a. A ni lah tak e, nupui nih a tlinin, a tih tur hi zo takin a tifel thlap a, ka nu leh pa a tilawm thiamin, duhawmna zawng zawng hi amahah hian a kim vek tih tur a ni.
Zingah a tho a, ka biangah fawpin, ‘Duhtak, morning, a tiziah a. Hospital kal dawnah min thlah a, ka hawin min lo hmuak a, ngai taka min kuahin min fawp thin. Zanlaiah emergency vanga hospital kal a ngaih pawn a vui ngai lova, min thlah a, ka haw hma min lo nghak leh thlap thin.
Ka nupui ang hmeichhia hi piang nawn leh pawh ni ila, ka hmu tawh lovang.
Chuti si, tinge ka nupui hi na taka ka siam theih le! Hetiang mipa nep lutuk ka lo ni ta mai hi a lungchhiatthlak a, ka inchhirna khua hi a va sei dawn em!!
Thla nga kan innei ta, nikhat chu ka patient pakhat hian ka nupui chanchin chu min zawt a, a fel em tih te, kan inkawm a, ‘In nu hi chu a hmeltha a, a fel, a fin pawh a fing a, a pasal hmasa kha a sual em a, chuti ni lo se, an inthen miah lo tur a nia, mahse, nang a nei che hi a vannei khawpin ka hria!!” (Chhunzawm tur)