West Ham United chuan Manchester City atangin captain Declan Rice leina tura Pound maktaduai 90 a an dilna chu an hnawl.
City in lei an dilna hi Pound maktaduai 80 pek phawt a, a bak chu khelhdan a zira inpek tlak tur a ni a. Nimahsela Hammers in Pound maktaduai 100 tal an beisei.
Arsenal in Rice hi tun nipui a lakluh an tum ber a ni a, a vawi thumna atan kum 24 mi England midfielder hi lakluh tumin an bei leh dawn nia ngaih a ni bawk.
Kar hmasa khan Gunners hian Rice hi Pound maktaduai 75 in lei an dil a. Hammers an dawr danah hian tum li a inpek hnuah a khelhdan a zir a Pound maktaduai 15 pek belh leh turin an dawr.
Rice hian Hammers hnenah hian kum 2024 thleng contract a nei a, nimahsela kum 2025 thleng pawhsei theihna a awm avangin kum hnih contract la nei anga ngaih theih a ni a, hei vang hian a club in man tlawm taka chhuahtir an tum lo.
Tun thla a Europa Conference League a an champion hnuah club chairman chairman David Sullivan chuan contract a ziah belh tawh dawn loh avangin Rice chu an chhuahtir ngei a rin thu a lo sawi tawh a ni.