India ram a sub junior badminton inelna lian Yonex Sunrise All India Sub Junior Under- 15 &17 Ranking Badminton Tournament-ah Under-17 boys single-ah H. Lalthazuala a champion.
Chanmari West rawlthar Thazuala hi a pa H. Zohmangaiha niin Tata Trust hmalakna a Pullela Gopichand Badminton Academy a in zir mek a ni a. Tun tournament-ah hian seeded number 6 a ni.
Round hmasa ber atang final thleng game hloh miah lovin a chak vek a. Final-ah hian Pranauv Ram N. chu 21-16, 21-16 in a hneh.
Under-15 boys doubles-ah Serchhip rawlthar Malsawmhlua leh a partner Mahendra Kalahasthi ten final an khel a. Seeded number one nihna changtu Arjun Tanaji Birajdar leh Aryan Tanaji Birajdar te nen intumin 17-21, 26-24, 20-22 in a tlawm zawkah an tang.
Lalramsanga, Durtlang chu Under-17 boys doubles-ah semi-final lut bawkin final erawh an lut zo ta lo.
Mizoram Badminton Association chuan Thazuala, Mama leh Ramsanga te an lawmpui thu an sawi a. Hlawhtlinna changa, Mizoram leh India ram ti hmingtha zel turin duhsakna sang ber an hlan.