- Lalthanliana Hlondo, Republic Veng
An thawm a na bawk a, tun tum chu ZPM lam sawi ang aw. Val Upa Council (VUC) hi kalphung thar hrinchhuah a nih hmel a, mi thenkhatin nuihzat deuh mahse, ZPM party tan chuan thil tangkai a ni nghal kau. VUC hi awm lo se ZPM party hi an ti dawn chauh kha keh darh leh nghal mai thei dinhmunah an ding deuh roh. Chief Ministerial candidate leh khatih hunlaia Secretary General ten inkar boruak an neih thu chu tlang sawi luai a ni a, kan hre thum. Mi tam zawkin kan hriat loh erawh chu tuna an President leh an Working President ten inkar boruak an neih thu a ni. VUC in an ko a, khunkhan takin an titipui hrep a, boruak an vaw dai thei hram niin an sawi a, a dik ka ring chiang.
ZPM VUC member te hi pa zahawm pui pui, thluak dai raih mai an ni a, politik tuinu a lo inchiah ve zuai tawh, politik a tawnhriat neite pawh an awm nual nghe nghe. Tun dinhmunah chuan an inrawlhna tur chin leh inrawlh lohna tur chin an hre viau. ZPM hian sorkarna siam ta se ‘tangkai’ nge an nih zui dawn ‘hnawksak’ tih erawh sawi lawk thiam a har fu. Lunglei Municipal Council leh Zemabawk Local Council inthlan hnua an hotu thenkhatte hawiher danglam chak dan thlir chuan ZPM hian sorkarna siam ta se VUC hi hnawk an ti vat mai angem, sawi lawk a har riau.
ZPM hi danglam tum niin an insawi a, official taka Bial Viltu han puan velte pawh hi a danglam viau, mi tihdan bak a ni. A huaisen thlak kan ti dawn nge a politik thiam loh thlak kan ti zawk dawn, zawngchhang chi nge bansan vang vang chi tih pawh a rawn la lang fiah zel ang chu. Bial Viltu tihphung hrim hrim hi rilru tluang taka party hmasawnna atana rawtna nge, chumi lam tang ten chumi lam tangte rep ro an tumna tih pawh hriatthiam a harsa ta tawlh tawlh mai.
Pu Hawla khan official taka bial vil lawk a phal ngai lo an ti, Pu Zoramthanga’n hman kumah bial vil tura tu tu te emaw hnenah green signal a lo pek ngawt te kha Nomination Committee ah a champion pui leh ngam si lo a, seat an chang lo ta phung mai si a, pu ber thu hmuin an lo insengso nasa tawh mai si a, a luhaithlak teh a niawm e. Khami tum a Serlui Bial a ding tura pu berin green signal a pek, nasa taka a zuk insenso hrep hnuah MNF Nomination Committee in Rajya Sabha MP hlui an luahlan tir leh tak si kha tuna Mizoram State BJP President hi a ni an ti. Dawt a green signal petu Pu Zoramthanga dim vak lo a a kheng zui fo hi a hrechiangte tan chuan thilmak a ni lo, BJP hotupa hi an thiam ru khawp mai.
Chhim lam hawi zuai ang, ZPM hi chhim lamah an boruak a invawrh thut a, seat inchuhna pawh tlang rin aiin a na ta riau, talhtum va zuar ila kan hralh thei nek mai thei! An boruak invawrhin Zoram pumah ZPM thli a tleh tir a, an seat inchuh thawm in Zoram pumah ZPM thli tleh a reh tir an ti. ZPM hruaitu lawk zinga mi thenkhat chuan Southern Headquarters hotunu hian beisei a pha lo hle tih an pha lo a, “Headquarters President hlei hlei hi alawm beisei pha lo chu,” ti pawl an awm bawk, politik hi basa ngam chi ni hek lo le.
Lunglei West hi ZPM tan bial buaithlak tak a ni mek naa, an tihfuh chuan an tlin theihna tur bial a ni. Tunhma atanga bial lo hahpui hrep tawhtu lakah bial mipuiin rinna an nghat ngam leh chuang dawn si lo a nih chuan candidate tur dang zawn a tul a ni mai a. Kawng lehlamah chuan party boruak hniam lai hun zawng zawnga lo hahpuitu inti ve tan chuan tuna party boruak that chhoh veleh a hnawl nih leh si chu a na duh hle ta ve ang. Saw lam bial hrechiangtute sawi danin Bialtu MLA, MNF sorkara minister ni mek hian ZPM candidate hnawl tak kha cho chikimin a cho a, an ruat thar erawh hi chu huphurh takte in a huphurh thung a, chuvangin, candidate hnawl tak lamte fuihpawrh a ZPM tana boruak chhe tak siam luih char char hi an khingpui party te tunlai hna ber a ni an ti.
ZPM hian Lawngtlai East ah MLA candidate atana sap pasal nei-i aia daktawr an ruat ngam hi an tifuh hle nia ngaitu an tam. YMA leh MZP mitmei ven a tul bakah an hruaitute sawi hmangin sap pasal nei-i hian an duh aiin sum a chelek mah mah an ti, MLA ah lo tling ta pawh ni se party discipline hnuaia kun a harsat an ring ru bawk, a pasal nena an inneih dan lai tak hi hriatthiam har tih riau lai an nei deuh nia sawi sep sep a awm bawk. Uar taka kalphung thar hlir sawi tur an nih laia campaign boruak sosang chho zelah thlen chin apianga sawifiah ngai, fiah fak a sawifiah harsa si a awm chuan a buaithlak ang. Amaherawhchu, sap pasal nei-i hian tlawm mai a tum loh hmel riau, a insum hram dawn nge, independent in a ding zui dawn nge, BJP ticket a beisei dawn tih lanchhuah hun tur chu rei a ni tawh lo ang.
Chief Minister bial vil tura ZPM in thuziaktu lar pakhat an dah avangin CM chu a rukin a nui ver ver tawh a, mahse, a tlai hmain an harh chhuak hman hlauh a, CM pawh a nui leh tawh rih lo an tih chu mawle! Bial Viltu atana an ruat, an ruat leh tak loh kha a ngawi zui mai lo lehnghal a, an tih fuh loh ber zinga mi a ni mai thei. ZPM OB zinga Nomination Committee a lang ve lo mi pathumte kha boruak ri hat an neih hnuah Nomination Committee ah an lut ve leh tlaikhawhnu a niawm e, an zinga pakhat chu Aizawl East I bial candidate atan an puang zui ta bawk a, helai bial chu an inchingfel mam ta thluam mai niawm tak chuan a lang naa, mam lo lai a la awm chiang.
Sum leh pai tam tak seng a Aizawl East I bial lo beisei ve rauh rauhtu ZPM party Treasurer lung a dam zo ngang lo a ni mai thei, party hnenah Show Cause Notice a pek rup hnuah leh intuamdam hna thawh zui a nih hnuah, a dam ta emaw an tih hnuah zing lam dar 2:00 a President phone harh a, an chhungkua an inrawnkhawm hnuah din a tum thu leh a tling a nih chuan Agriculture Minister nih ngei a duh thute an infah nual niawmin titi a awm. ZPM hruaitu lawk zing mi erawh chuan, “Kan zinga ani tel zui leh zui loh hian kan party ah danglamna engmah a thlen tak tak lo ang,” a ti hmiah thung an ti.
Dampa savawm a hukna bialah ZPM zaithiam hi mi tam takin a inban liam ve hram dan tur an la hmuh thiam pui vak lo. Helai biala ZPM ticket beisei ve tu lah chu a hriate sawi danin tunhma atangin ZPM Leader hian a hna bansan tawh tur leh uluk zawk a Dampa Bial lo vil tan tawh tura a tih fo pawh a thawm nei thei lo, tunhnuah ZPM boruak a that tak hnua thawm rawn nei leh chauh angin an sawi mauh mai a. Chuvang chu nge ni, a hna bansan tlaikhawhnu mahse zaithiam thawm na tak a rawn zuang lut tawh si a, hotute rilruah a tla na thei tawh lo an ti. Huaikawm a bawl zui vaih erawh chuan zaithiam hi chu pathumna velah chuan a awm pha ve mai thei an ti bawk aw.
Aizawl South II hi ZPM kulhpui, an bial him a chhal theih deuh thaw a ni ta a, ZPM hian MLA leh AMC Councillor an nei mek. Aizawla veng hlun ber ber awmna, kohhran lian ber thuthmun a ni a, inthlan hnuhnung berah tling tura tlang rin loh ber ZPM candidate chu sum seng mang lo leh tha thawh mang lo a a tlin khutna bial a ni. Bialtu MLA hi a tlin nawn loh palh hlauh puina boruak a len vang nge, titiah chuan Hrangturzo Bial an sihhmuh a, AMC Councillor ni mek hi South II a ding turin an it zawk tih thawm a awm. Chuvang chu a ni mai thei, MLA leh Councillor inkarah khi a awm an ti, hei hi ZPM tan chanchin tha a ni lo.
Aizawl South II hi ZPM tan a him zui leh him zui loh chu helai biala party dangte candidate a zir a ni thui viau ang. Chu chu hria in MNF hian helai biala ding tur mi an dap uluk hle, sawm hlawhtlin erawh an la nei chiah lo, an account a crore 2 bawr thun sak nghal thlenga an sihhmuh hlawhchham si te pawh an awm. Mission Veng Kohhran Upa thenkhat an sawm hlawhchham thu a lar a, hotute thu hmu a a ruk thei ang bera an sawm hlawhchham zingah helai bial mihlun, Venghnuaia piang, Mission Venga pem, Thakthing Venga inbenbel tum, college zirtirtu, Aizawla lui lar tak tana beitu pawh a tel an ti. Ani hi a hawi tawhna lam chu kaw hlawih khawp a bei chi, fighting spirit nei tha a ni a, tunhmain party dangte pawhin an lo sawm hlawhchham nual tawh an ti.
Helai bialah hian candidate beisei, MNF party in an it si loh zingah inthlan a la hlawhtling thei lo Kulikawn pa pahnih, Kohhran Upa ve ve hming a rik rin bakah Tlangnuam mi, Catholic Kohhran, police lal, pension tep hming pawh zawite in a ri faih faih an ti a, ani hi a pension hma atanga MNF party mi anga mi ngaih a ni pek a! Lok Sabha MP hlui, party OB zinga mi, bial chhung mi, Tuikhuahtlang pa hi beidawn tawpah an dah mai ring pawl an awm. Aizawl khawpuia MNF boruak thlir chuan anni hi chu an sitawm deuh mai thei, mithar lehzual, boruak vaw alh thei an mamawh. MNF hian tihsual leh virpilh an hlau a, candidate tur zawnna boruak inlumletah party in a ruk a ral thei ang ber a an sawm thenkhatte hi chu Hnam Run kal taima te ngei pawhin an sawm tih pawh an hre lo mai thei an ti. Aizawl South II ah hian ZPM leh MNF te hi inbei ber tur an nih hmel a, Congress candidate tur, an party Treasurer thar hi pa pakhat chuan, “Kan bialah chuan a nau hi rawn ding se vote a hui hnem zawk ang,” zuk ti teh daih a.
A dawtah MNF leh Congress ve thung aw.