Aizawl: Rural Development Minister Lalruatkima’n nimin khan Chawngtlai leh Puilo khuaah RURBAN Commercial Centre a hawng.
Khawzawl district chhunga awm Chawngtlai leh Puilo khuaa RURBAN Commercial Centre hawn te hi sorkar laipui Ministry of Rural Development-in Shyama Prasad Mukherji Rurban Mission (SPMRM) kaltlanga sum hmuh Rs nuai 292.98 ve ve hmanga sak a ni.
RD minister chuan thingtlang khuain hma an sawnna turin scheme kaltlangin department-in hna an thawk tih a sawi a. Hmasawnna kawnga ke an pennaah vawi leh khatah khawvel dang hmasawnna neih nghal vek theih a ni lo va, mahni theihna leh inbuatsaihna nen kalkawpin theihtawp an chhuah zel tih a sawi.
Lalruatkima chuan India ramah SPMRM cluster 300 awmin, Mizoramin cluster pali – Aibawk, Khawzawl, Thingsultliah leh East Lungdar RD Block a nei a. Thingtlanga chengten eizawnna ngelnghet leh tlo an neih theihna tura kawng kawhhmuh hi he mission hian a tum ber a nih angin, heti lam hawi zawngin hna tam tak an thawk a, a hlawhtlinna an hmu chho zel chu lawmawm a tih thu a sawi.
Puilo leh Chawngtlai khua leh a chhehvel te chu khaw taima, buh leh bal, thlai leh theirah chin kawngah pawh hlawhtling tak tak an nih avangin, he commercial centre hi a tangkai hle dawn tih sawi a ni.