Mizoram Youth Commission (MYC)-in Super IAS Programme an kalpuinaah RS nuai 190 vel sum a seng ral tawh a, kuminah pawh a kalpui leh dawn.
MYC chairman Dr Vanlaltanpuia chuan nimin khan a pisaah chanchinbu mite a kawm a, IAS coaching kalte an sponsor thin ang chu kuminah pawh chhunzawm leh an tum a, tun tumah erawh coaching kal tur hi a lak zat tur bitliah a awm dawn lo tih a sawi a, UPSC exam tura tha tawka an hriatte an la tawp dawn a, an lak dan turah erawh tehna mumal tak an nei dawn tih leh July 10 khian entrance exam neih tur a nih thu a sawi.
The Zozam Times zawhna chhang chhunzawmin Super IAS programme hnuaiah zirlai 60 chuang an sponsor tawh a, MYC super 20 atan Rs. nuai 40 vel an sen thu te, MYC Super 40 kal mekah Rs. nuai 150 vel an seng tawh a, a vai hian Rs. nuai 190 vel sen a ni tawh tih a sawi.
MYC chairman chuan UPSC prelims 2023-a Mizo thalai inziak tling mi 13-te chu mains exam an hmachhawn lehna turah MYC-in buaipui vek dawn a, an zinga mi 10-ten Aizawl centre atangin exam an pe ang a, mi pathumin Delhi atangin exam an hmachhawn dawn tih a sawi a, Aizawl centre atanga exam pe tur mi 10-te chu MYC exam centre-ah coaching pein, online coaching class an ruahmansak dawn tih a sawi.
Dr Tanpuia chuan MYC hnathawh hrang hrang sawi chhunzawmin, MYC leh Charcos Global thawhhona hnuaiah UK-a registered nurse thawk tur occuptional english test (OET) patlang tawh mi 12 an awm a, international english language test system (IELTs) patlang tawh mi pasarih an awm tih a sawi a, MYC-in 2018 atanga 2022 inkara coaching an buatsaih atanga zir chhuak mi 141-in sorkar hna an hmu tawh tih te, private company, insurance company leh bank-a hna hmu pawh thahnem tak an awm a, coaching an buatsaiha kal zinga mi 70 chu sipaiah an luh tawh thu a sawi bawk a ni.