- David Zochhuanmawia (Vida Hrahsel Saza)
June 2 – 30, 2023 chhunga neih ‘Tata SK 712 Pro-Volleyball League 2023’ chu a lo zo ta reng mai. Mizorama Volleyball Tournament inelna sâng ber ni bawk kha a tha lam chin tawitein han thlir lêt ve thuak thuak teh ang. Sports lam Article a tam loh êm hi maw!
A buatsaihtute –
Mizoram Volleyball Association (MVA) & LPS tangkawpin an buatsaih a ni a. Kum 2016 khan Pro-Volleyball League hmasa ber bul tan a ni. Tournament kha a hlawhtling ang nge, hlawhtling lo ang tia a buatsaihtu ten an ngaihtuah mek laiin Zothan Auto-Works, Pu Zothantluanga te’n a vawi khatna atan ‘Title Sponsor’ an nih sak hlauh mai a. Thalaite tan tiin sum tam tak sêngin Tournament hlawhtling tak neih a ni nghal a. Anastasia Volleyball Club, Electric Veng chu Champion hmasa ber an ni.
Mizoramah Volleyball dinhmun a tlak hniam mek laiin MVA hruaitute chuan ngaihtuahna sêngin Mizoramah Volleyball tih lâr thar a tulzia an hmuh hmaih lo a. Visual Media lama thang duang tak leh Subscriber ngah êm êm LPS neitu Pu Sawma dâwrin Tournament neihpui a Volleyball hmasawn (promote) dan tur an sawipui a. MVA hruaitute leh LPS thawhhona tha tak kaltlangin vawiin thlengin Volleyball hmasawnna a takin kan hmu chho ta zel a ni.
2017 & 2018 & 2019 Pro-Volleyball League –
Pro-Volleyball League hi Kum 2016 atang khan kum tina neih tura ruahman a ni a. Kum 2017 khan hlawhtling taka neih leh niin Hunthar Volleyball Club an Champion a ni. Hemi kum hian Hmeichhe Team telh a ni a. Electric Veng Volleyball Club-in Power Department Sporting Club-te Final-a hneh lovin P&E (Women) an Champion bawk a ni.
Kum 2018 khan a vawi thumna atan Pro-Volleyball League kha MVA & LPS tangkawpa neih a ni leh a. Kha mi tum pawh khan Hunthar Volleyball Club bawk Champion-in, Hunthar te hi a zawna Champion thei awm chhun leh vawi hnih Champion thei awm chhun an la ni bawk a, PVL Club-ah chuan Record nei tha ber an ni. Kum 2018 hian hmeichhe team telh an ni lo thung.
Kum 2019 khan COVID natna khirh tak a rawn lang tan a. Chutih rualin MVA & LPS te khan Volleyball inelna neih hram dan an zawng a. Indoor Stadium duhthusam a awm lo nachungin remchang tak maiin Chawnpui Indoor Stadium a lo rem leh hlauh mai. Kha mi tuma a hlawhtlinzia kha khatih hunlaia Chawnpui Branch YMA hruaitute khan an la sawi ve reng nia! Kum 2019 khan Chhinga Veng Spikers an Champion a ni. Hemi tum hian Hmeichhe team telh a ni ve leh a. Durtlang Volleyball Club-in Bungkawn Volleyball Club Final-ah hnehin an lo Champion tawh bawk a ni.
COVID-19 avangin kan chawl thup –
Kum 2020/2021 a nih meuh chuan Mizoramah COVID-19 avanga nunna chân engemawzat an awm a. Khawlaiah pawh chhuak tha ngam lovin mahni inchhungah kan tawm a, khawtlang hruaituten an theih ang leh an phak ang tawkin ei leh in turte min pe khawm a nih kha! Kha hun khirh tak avang khan kum 2020 leh 2021 khan Pro-Volleyball League hi neih a ni ta lo a ni.
Sports discipline hrang hrangah thalaite an tuihâl –
COVID-19 a kiang a, thalaite kan za zek zek a. Events engemaw hlekah kan tleh dul dul zel a, kan tui a hâl tlang tak zet a ni. Sumdawng tan sum a vâng êm êm a, neih chuang liam nei sa tan lo chuan hun khirh tak kan hmachhawn tlâng a ni.
Kum 2022 kha COVID-19 avanga sum leh pâi van hunlai tak a ni a. Chumi karah chuan Zothan Auto-Works bawk rawn lang lehin, a vawihnihna atan ‘Title Sponsor’ an ni leh hlauh a. A buatsaihtute lawmzia kha! Pro-Volleyball League chu a vawi ngana atan neih a ni leh thei ta a ni. Hemi kuma mipui tam zia kha mak tak a ni. Mipa Final-ah khan Durtlang North leh TNT an inkhel a, a hmuna leng lo zu pungkhawm a maw le! R. Dengthuama Indoor Stadium kha a chim ang tih hlauhawm khawpin mipui an thahnem a. Tournament hlawhtling tak a ni kan ti thei ang. Mipa lamah Durtlang North an Champion a; Hmeichhe lamah Bethlehem Vengthlangin Bungkawn Volleyball Club hnehin Champion nomawi an hawn bawk a ni.
Volleyball hmasawnna a zuânin a zuâng –
Kum 2023 kan lo chuang kâi a. Mizoram Volleyball-in nasa takin hma a sawn a. Association pawhin nasa takin hma a sawn bawk a. Player-ten hma an sawn a, State pawn player tih theih ang ti thei hial player kan nei ve ta! Sawi hmaih theih miah loh pawimawh em em Club neitute hmalakna nasa tak avang a ni a. MVA awm lo se Club a awm a ngai lo a, Club awm lo se Player an awm a ngai lo bawk ang. Chutiang chiahin Player awm lo se Club a awm a ngai dawn lo a, Club awm lo se MVA a awm kher hi a tul lo thei bawk. Thil inkhaidiat fuh em em leh inhne rem em em kal kawp tlat an nihna hi a hlawhtlinna bulpui ber a ni a. Thawhona tha a awm avanga Volleyball hian Mizoramah hmasawn thei a ni. A kila lung tangkai tak tak kan sawi hmaihte thlenga thawhhona a that vang a ni.
Kumin 2023 hian Pro-Volleyball League Final vawi thum lut tawh Thutak Nunpuitu Team (TNT) mipa an Champion a, an thawhrim rah leh mizo hlanga Champion nomawi an dawng thei hi an lawmpuiawm tak zet a. Player of the Match, Best Spiker (for the Tournament) leh Mizo Best Player Award (Refrigerator) dawngtu Vanlaltanchhana (Valbuanga), Kawnpui Chhim Veng tlangval ngat, State pawn player-te aia langsar a ni thei kha a fakawm a. Mizote hi kan theihna a sâng tawh hle a, a ti tak tak peih leh hlawhtlin ngei tum tan chuan kawng a inhawng zau tawh hle a ni.
Hruaitu neih that a pawimawh –
MVA President Dr. Lalmalsawma Nghaka hi Volleyball Federation of India, Vice President ni lâi a ni a. MVA hian Dr. Mala an nei hi an tangkaipui hle a. A ni hi nei lo ta se tuna hmasawnna zuâng mek hi a thuanawp ve thei reng a ni. President mahni sum leh pâi sêngso thin, a huna pûk a ni emaw, pêk a ni emaw, tlan chhe ngai lo President an nei hi an hmasawnna rahbi pawimawh tak pakhat a ni a. Pâwl a awm chuan sum a lo ngai a, hmasawn tur chuan Pathian tih loha pawimawh hmasa ber a ni.
Pâwl chakna hnâr pawimawh ber chu General Secretary neih that hi a ni. MVA hian NGO hrang hranga inhmang thin leh la inhmang mek, pâwl nihphung hre sa êm êm Pu C. Lalrokhuma (Puitea), Electric Veng Aizawl an nei a. A ni hi Volleyball Federation of India, Development Committee member ni lai mek a ni bawk. Pu Puitea hi kum lamah pawh naupang tawh hauh lo, experience nei tha êm êm a ni a. A hmalakna chak tak avangin an pawl hi nung takin a kal theih phah a. Tin, a hunah mahni sum leh pâi sêngso hreh hauh lo leh aia naupang zawkte lakah pawh inphahhniam a, inngaitlawm thei tak mai a ni a. Mizoram Volleyball Association chak chhan bulpui ber chu amah hi a tih loh theih loh a ni.
MVA ah hian Elected OB 8 awmin, an ni hian an thawhpui theih tûr OB ruat belhin, Executive Committee member mi engemaw zat an ruat bawk a, Patron leh Adviser tha tak tak an nei bawk a ni. Mizoram Sports discipline nung leh chak ber an ni ti ila tun dinhmunah chuan kan sawi sual hauh lo ang.
A tlipna –
Pro-Volleyball League hi vawi ruk neih a ni tawh a. Zothan Auto-Works neitu Pu Zothantluanga te hian vawi thum lai mai (2016, 2022 & 2023) ‘Title Sponsor’ an lo nih sak tawh a. Hetiang mi inphal, thalaite tana an thawhchhuah ui lo te hi Pathianin mal a sawm let zel ang tih a rinawm a. Midang tana luangchhuak nun neih hlutzia hi anmahni hian an hrechiang zawk âwm e.
Mizo thalaite’n ruihhlo tlansan a, Games & Sports an khelh nasat hi ‘Ram leh Hnam humhalhna’ pawimawh tak niin ka hria a. Tiâng (stick) hmanga thalaite siamthat tum ai chuan infiamna chi hrang hrang hmangin thalaite siamthat tum chho tan ila, khawvel a changkang a, social media-ah pawh kan chak tawh a ni kan tih rualin thil dangah pawh changkan belh zel tum ila, thalai kan hneh theih dan awlsam leh tha, sum leh pai sên a lo tam hret zawk a nih pawhin mi pakhat vanram kan hruai thlen theihna a nih chuan Sports hmanga nun kawng dik kan zawh tir hi kan Missionary ve theihna a ni tih hriain Pathian lawmna leh kan mihring puite lawmna siam tûra ke pên thar zel turin ka thalaipui leh Mizoram mipuite ka sawm a che u.