- Ruata
Harley Davidson bike man tlawm ber tur, X440 chu tlangzarh a ni ta a, Rs. Nuai 2.50 (ex-showroom) man atangin a intan a. He bike thar hi Hero MotoCorp leh Harley Davidson tangkawpin an duan niin India rama Harley Davidson bike an siamchhuah dun hmasak ber a ni.
A hma pawha kan lo tarlan tawh angin hetiang midsize bike huangah hian bike thar kan hmuh nual dawn bakah tunah pawh inelna hi a sang chho mek a. India rama bike hralh tam ber pawl huang a ni mek a. He Harley bike thar tur pawh hi Honda CB350 leh Royal Enfield Classic 350 te nena inel chho tura beisei a ni a, a milpui deuh bike dangte nen pawh market lamah chuan a inel thei vek bawk awm e.
Chi hrang leh a man
Harley Davidson X440 hi chi thum – Classic (wire-spoke wheel nei), Vivid (alloy wheel nei) leh S (diamond-cut alloy nei) te a awm dawn a. Classic hi Rs Nuai 2.29 man tur niin, Vivid hi Rs Nuai 2.49 man a ni thung a. A to ber leh changkang ber S variant hi Rs Nuai 2.69 man a ni thung a ni. Heng a man tarlan te hi ex-showroom man niin on-road price chu hei ai hian a to hret dawn a ni.
A khawl leh thildang
Harley-Davidson X440 hian 440cc, single-cylinder, oil-cooled engine khawl hmangin hei hian 27bhp power chu 6,000rpm-ah a pechhuak thei a, peak torque 38Nm chu 4,000rpm-ah a pechhuak thei bawk a ni. Heti a nih chuan a elpui tur hnaivai deuha ngaih, Royal Emfield Classic 350 aiin a chak tha zawk dawn a, Classic 350 hian 20bhp power and 27Nm torque te a pechhuak thei a ni. Harley Pan America angin he bike hian a pawt kal tuah chain pangngai a hmang a. Transmission lamah chuan 6-speed gearbox a nei a ni.
Suspension lamah chuan Harley-Davidson X440 hian 43mm USD (upside down) front fork leh a hnunglamah twin shock absorber te a hmang a. Brake lamah chuan a hmalamah 320mm disc leh a hnunglamah pawh disc tho hmangin, Bybre’s brake caliper a hmang a. Dual-channel ABS (anti-lock braking system) neiin side-stand engine cut-off function pawh tunlai bike dangte ang bawkin kan hmu a. A ke hmaah 18-inch hmangin a hnunglamah 17-inch MRF tyre te a hmang a. He Hero-Harley bike thar hi tubular trellis frame nghahchhana duan a ni.
A design leh siamphung
Harley-Davidson X440 ke dahna hi cruiser style-a hma vuta awm loin a laiah, mid-set footpeg an tih angin duan a ni a. Handle bar zawl pangngai tak a hmang bawk a ni. Retro-styled headlight bial neiin hetah hian LED DRL bar chuan a laiah a tan tlang a, speedometer bial neiin a fuel tank design lawk ve tak leh handlebar sei vah mai hian Harley-Davidson Nightster te pawh a pawl viau a ni. Indicators leh darthlalang te hi a bial an ni bawk a, a taillamp hi a sawl thung a ni. A khawl bawr hi a rawng an ti dum a, a exhaust pawh a dum niin a ri pawh ring hluah hluah si loin a mawi tawk viau a ni. A kentel zingah hian fully digital instrument cluster with TFT display, turn-by-turn navigation leh Bluetooth connectivity (a man to berah) te a tel bawk a ni.
Harley Davidson bike ho hi Mizoram ngei pawh a tam ta hle a. Pawl hial an indin a. Hetihrual hian man to tak tak an ni thin hlawm a. Tuna rawn chhuak thar hi chuan a liantham leh a man to ho chu a el pha dawn lo a. Amaherawhchu a man hi Harley bike dang ngaihtuah chuan a rawn tlawm viau mai a, bike man tlawm tak erawh a ni chuang lo. Hero nena tangkawpa an duan hi mi nawlpui lei phak Harley Davidson bike a ni dawn a tih loh theih loh thung a, he company ngaisang leh he bike ngainatute tan chuan thu lawmawm tak a ni a. Market lamah pawh a chet that viau beisei a ni.