Odisha rel chesual: Thla khat hnuah pawh ruang hlawm loh leh hriat loh la tam

India-a rel insutna rapthlak tak, mi 293 vel an thihna a thlen atanga thla khat chuang a liam hnuah ruang 50 chu tunge an nih la hriat loh leh hlawmtu tur awm lovin an la awm mek.

Odisha-a rel insutna hi June 2-a thleng kha niin mihring phur relin bungraw phur rel a su a, an sir kawngah letin chu chu rel dangin a su zui leh a ni.

Chetsualna thlengah hian mi 1,000 chuang hliam tur awmin tun kum zabia India-a rel chetsualna thlenga thi an tam ber tum a ni.

Chetsualna thlennaa thil chhiate chu siam that leh vek tawh a ni a; mahse, chhungkaw tam tak chuan an chhungte chin an la hre lo va, an ruang pawh an la hmu lo.

Khawchhak lam, West Bengal-a mi, Shiv Charan chuan Odisha khawpui, Bhubaneswar-ah a chhungte ngaihvenin thla khat vel a awm ta tih a sawi.

A awmna hmun hi sorkar damdawi in, AIIMS bul niin hetah hian ruang an dah khawm a ni.

Damdawi inah hian ruang 52 awmin deep-freeze container-ah dah an ni a. Thenkhat chu an hmelhem nasa hle a, an chhungte tan pawh hriat harsa tak pawh an awm.

Charan-a hian a khât tawkin damdawi in hi a tlawh reng a, a unaupa, tawhsual an tawh hma lawk pawha a biak, Krishra chu hmuh a tum a; mahse, a la hmu thei lo va, a chin a la hre lo.

A unaupa hi a thawmhnaw atangin a hre thei a; mahse, a ni ngei tih finfiah turin DNA test tih a ni a, chu result a la nghak mek tih a sawi.

Mi dang ang bawkin Charan-a hian a DNA sample pein endik mek a ni a, hetiang hi ruang inchuh a awmin a tu nge dik zawk tih hriat theih nana tih a ni.

“Tumahin report chhuah hun tur min hrilh thei lo,” tiin Charan chuan BBC a hrilh a, a unaupa ruang nen lo chuan a haw dawn lo tih a sawi a. “Tha taka amah vuina hun buatsaih ngei ka duh a ni,” a ti.

West Bengal-a mi tho, Anzarul Haque-a pawhin a nupui leh a fate pathum, naupang tete a kalsan a, tun thlengin an pa ruang hi an la hmu lo.

Haque-a unaupa hi Bhubaneswar-ah la awmin ni tin damdawi in a tlawh a. DNA sample an laksak report a ngaichang ve mek.

“Thla khat chuang a liam tawh a; mahse, engmah hriat kan la nei thei lo,” tiin Mohammad Kareem chuan a sawi.

Chhungkaw tam tak chuan an lainate ruang hmuh leh inbeiseina an nei chau tawh hlawm hle a ni.

Leave a Reply

error: Content is protected !!