MPCC Chief Spokesman Ronald Sapa Tlau chuan nimin khan Congress Bhawan-ah thu thar thehdarhtute a kawm a. UCC hi pass ni mah se, Mizoram Legislative Assembly-in a pawm ve kher loh chuan Mizoramah hman theih loh anga an sawi chu ngaihdan hlauhawm tak a nih thu a sawi.
Ronald Sapa Tlau chuan BJP-in eng emaw chen an lo tum tawh, UCC chu India ram puma hman a nih thuai theih nan parliament session leha put luh tum a nih thu chu chawlhkar khat liamta khan Bhopal-ah Prime Minister Narendra Modi-a’n a puang tih sawiin, “Hei hi India mipui tam zawk tana thu lawmawm a nih theih laiin hnam tenau leh sakhaw tê zawk tam tak tan thu thinthawng a ni thung a. Keini Mizo hnam, Kristian sakhaw betu tan ngei pawh kan hnam nun, sakhua leh ni tin nun min thiahsaktu leh kan hnam ziarang bo thak khawpa min nghawng tur a nih avangin Mizo Kristiante rumin min siam ta a ni,” a ti.
Article 371-G hi Mizoram tan special provision a nih avangin, ‘parliament-in UCC hi pass mah se, Mizoram Legislative Assembly in a pawm ve kher loh chuan hman theih a ni lo ang’ tia sawi awm mek chu ngaihdan hlauhawm tak a nih thu Ronald Sapa Tlau chuan sawiin, “Thudik tluangtlin zawk chu, UCC dan hi BJP hoin parliament-ah an pass vaih chuan ‘Kashmir Special Status’ tia an chhuan em em pawh kum 2019-a BJP sorkarin Kashmir state a thiah rual rualin an special status kha a bo nghal dan kan hmuh tawh atang khan, Zofate sakhua leh hnam inhumhimna tur chuan Mizo mipuite himna awmchhun, parliament-a UCC pass an tum hi tho thil ang thapa a tawp thlenga kan lo do zel hi tihmakmawh a ni,” a ti bawk.
UCC chu India ram inpumkhatna tichhe theitu tur, hnam tenau leh sakhaw tê zawkte rahbehna leh inchimralna hmanraw hlauhawm tak a nih dawn avangin a tawp thlenga dodal tlat a ngai tih chu Congress party ngaihdan nghet a nih thu MPCC chief spokesman chuan a sawi a. India mipuiin an ngaihdan Law Commission-a thlen hun (June 14-July 30, 2023) chhung ngeia thlen tura MKHC-in thahnem ngai taka party tinte a ngen ang ngeiin MPCC President Lalsawta chuan a remchan veleh an party dodalna thu a thlen dawn niin a sawi.
Ronald Sapa Tlau chuan sakhaw tenau, hnam hnuaihnung leh tlem zawkten central BJP sorkarna hnuaiah enhranna, dodalna leh tihduhdahna an tawng ta foah puhin Mizoram chhunga zalenna leh hnem leh sakhaw nunphung tihbuai loha a awm zel theih nan Mizoram kohhran ho te, party hrang hrang leh NGO te pawh pen chhuaka BJP leh an sangawizawnpuite lian zel tur leh parliament-a UCC pass an tum mek chu khauh tak leh lungrual taka lo dodalpuiah mi zawng zawng a sawm bawk.
UCC dodal kawngah hmarchhak state dangte nena tanrual emaw, thawhho tumna emaw a awm em tih zawhna chu Ronald Sapa Tlau chuan, “Congress-in hmarchhak state-ah sorkarna kan nei lo a. BJP kaihhruai NEDA hnuaia sorkarna siam deuh vek an ni a. Hetih lai hian NEDA thu pawh a saisa tan niin a lang a. State thenkhat phei chuan UCC an dodal tur thu hi an lo puang tawh bawk,” tia chhangin, Nagaland leh Sikkim-ah chuan do turin JAC ten hma an la mup mup tawh niin a sawi.