Zirlai pawl pahnihin tun hnaia assembly secretariat-a thawk tur lakna chu sut turin phut mah se Mizoram Legislative Assembly Secretariat-in appointment an pek tawh chu sut leh chiah an ngai lo.
Mizoram Legislative Assembly Secretariat chuan nimin khan thuchhuah siamin tun hnaia hna hrang hrang – assistant, translator, LDC leh UDC an lak dan an sawifiah a, heng hna lakte hi The Mizoram Legislative Assembly Secretariat (Recruitment & Conditions of Service) Rules, 1995 (as amended) dan ang thlapa lak a nih thu an tar lang.
An thuchhuahah chuan hna lak nan hian dan angin chanchinbu pahnih, Mizo Aw leh Dingdi-ah te kumin January 25&26 khan advertisement an chhuah a, a tirah sum inrenchemna avangin post panga lak tura tih ni mah se sum dinhmun a ziaawm hnuah post riat lak an ti leh zawk a, chanchinbuah pawh tihdikna an siam a, hna dil tuma application la chhuak pawh mi 2,369 lai an awm tihte an tar lang.
Mizoram Legislative Assembly Secretariat chu Indian Constitution Article 187 hnuaiah secretarial staff hrang nei tura tih a nih angin recruitment rules leh service condition pawh he article hnuai veka thuneihna nei a nih angin tha a tih angin a kalpui thin tih an tar lang bawk.
Mizoram Legislative Assembly Secretariat-a hna hrang hrang lak chungchanga pawl thenkhatin hma an la chu thil tha duhna a nih avangin lawmawm an tih thu tar langin, hetihlai hian an duh dan anga appointment hi cancel leh a nih chuan dan ang thlapa lak an nih avangin court-ah kal se secretariat lam hian an hneh dawn lo tih leh hei vang hian cancel leh chi-ah an ngai lo tih sawiin, he hna laknaa exam-a mark leh mahni answer paper-te pawh a duh tan RTI hmanga dil theih reng a nih thu an tar lang bawk.
Tar lan tawh thin angin zirlai pawl pahnih, MZP leh MSU chuan tun hnaia assembly secretariat-a thawk tur hna lakah hian thil fel lo leh chhungkhat laina, vua leh vang induhsakna uchuaka awm nia ngaiin hna lakna order hi July 6 ral hmaa ngeia sut an phut a, sut a nih loh chuan assembly secretariat pisa kawtah punkhawm an tum.
Nimin tlai khan zirlai pawl hrang hrang – MZP, MSU, hnampual zirlai pawl leh college SU-te chu an thukhawm a, assembly secretariat hna lakah chhungkhat laina induhsak bikna a awm avanga cancel tura an ngennain awmzia a neih loh chuan Zirtawpni zing dar 8:30 khian assembly house kawtah punkhawm a rel.
Zirlai pawl hrang hrang hruaitute chuan he punkhawmah hian Mizo zirlai zawng zawng leh Mizo thalai hna zawng mekte ko kim taka tel turin an sawm a ni.