Mizoram Basketball Association a senior vice president ni lai Dr. Lalrinawma Hnamte chu Nilaini khan Basketball Federation of India vice president atan an thlang.
Delhi a Jawaharlal Nehru Stadium-ah BFI inthlan hi neih a ni a. Tamil Nadu Basketball Association president ni lai Aadhav Arjuna chu president atan thlan a ni.
Vice president pasarih thlan zingah Dr. Lalrinawma hi a tel a. Secretary leh treasurer bakah joint secretary panga thlan an ni bawk.
Dr.Lalrinawma hian thlan tlin a nih chungchangah Mizoram basketball atanga thlawpna a dawn na zawng zawngah lawmthu a sawi a. Theihtawp a India leh Mizoram basketball hmasawnna atana a theih chinah hnathawh a tum thu a sawi.
Inthlanna hi Basketball Federation of India Administrator Justice Krishna Bhaat, Karnataka High Court Judge thin in a kaihruai a. Mizoram basketball chanchin a vawikhatna atan BFI-ah vice president nihna chelh thei hruaitu Mizoram in a nei dawn a ni.
Mizoram Basketball Association president R. Lalnunpuia chuan Mizoram in a la tawn ngai loh hetiang ang Basketball Federation of India a vice president nihna chelh thei a nei thei hi hmasawnna tam tak Mizoram tan leh North East tan a nih theih ngei a beisei a, a lawmpui thu a sawi ve bawk.