Mihringin a tum ber chu hmasawnna hi a ni ber mai hian a lang a. Kan nitin khawsakna chu a hma aia nuam zawk, changkang zawk hi ni berin a lang. Engkim maiah hian kan awmdan pangngai aia hmalama ke pen tum hian kan hawi a. Chu chu ramdang tih dan pawh an ni tho. Siamtuin a min siam dan reng pawh a ni. Chu rilru kan put avang chuan kan ram kalphung fuh lo lai nia kan hriat chu mitinin kan aupui ta thin bawk.
Kan ram politics ah pawh mipui rilru hre ranin kan politiciante chuan hmasawnna chi hrang hrang an au pui a. Mahse an tum leh sawi anga thil an tih leh theih si loh avangin an lakah mipui kan lungawi lo leh ta thin. Kan hotute nise a sum leh pai insawi hmuhsiak zawng vekin an kal bawk. Kan hotute hian sawrkarna an chan chuan chumi khami chu kan ti dawn a ni an han ti liam thla zung zung mai bawk si. Hei hian a hrinchhuah chu lungawi lohna a ni ta thin a ni.
Kan kalphungah hian mipui kan lungawi lova, kan bei a dawng a. Tunhnaiah mi thenkhat pawhin kalphung thar tih hial an rawn auchhuah pui ta anih hi.
Kalphung thar hi engdang tehchiam a ni lova. A hmaa kan kalphung dik lo, eirukna leh hlemhletna, hleihneihna kalsana, hmasawnna kawng dik zawh zawnga kal a ni ber. Hmasawnna kawng dik zawh tur hian engnge pawimawh ber tih hi zawhna a lo ni ta a. Chu chhanna chu thil dang tehchiam awmin a lang lo. Kan rama bu khuar nghet tak eirukna umbo/tih kian hi a ni lo thei lo a ni. Kan ramin hmasawn si lova kan politiciante an hausa thur thur chu kan hmu reng mai. Hei hi a bul ber a ni a. Kan politiciante eirukna hrek beh hi a ngai hmasa chu a ni ta a ni.
Hemi dawt lehah engnge lo awm? Zawhte chu tunge thi awrh tir ang tih a ni ta. Politician te hrek bet tur hian tumahin theihna kan nei lova. Mi pakhat chiah kan ramah a awm. Chu chu chief minister a ni. Chief minister berah hian eirukna hrek bet ngam tur/hrek beh duhtu kan neih a ngai. CM in chumi chu a duh phawt chuan a hnuai lam hi chu thil harsa a awm tawh lovang. Eiruk theihna power nei ber minister pawh khan CM hlauh vangin an eiru ngam tawh lovang a. A eiru anih chuan CM khan a ban nghal ngam ang. Hei hi kalphung thar chu a ni mai.
Chutiang CM tur chu tuna kan ram hruaituah hian an awm dawn em ni ti ta ila, kan ram hruaituteah uluk taka kan CM candidate kan en a ngai ta a. An thusawi mai piah lamah an hun kal tawhah engnge an dinhmun en in thlanchhuah awm chu an lo lang mai a. Eirukna leh hlemhletna laka fihlim hruaitu kan nei ngei a, a hun kal tawh atang pawhin a la fihlim a ni tih tur chu an la awm a ni.
Thenkhat hi chu eirukna tur remchang la hmuh loh vanga fihlim anga lang ve mai mai a awm theih. Mahse, sawi neuh neuh tur awm si te pawh a ni thei tho. Chuvangin kan ram hi KALPHUNG THAR a kal tura kan duh chuan tu hi nge eirukna laka fihlim tih i thlir tawh ang u. Chu chauh chu kan ram dinchhuahna a ni ngei ang