Nato sipaiten an ram an chhuahsan hma lawkin, Taliban chuan Afghanistan khawthlang lama an khawpui pawimawh an lut leh ta a, huang an zauh chhunzawm zel.
Badghis province khawpui, Qala-e-Naw-a sorkar pisa pawimawh zawng zawng chu a bul lawka sipai hmunah sawn vek a nih thu governor chuan BBC hnenah a hrilh.
Helho hian khawpui laili lam an pan zel a, sorkar sipaite nen nasa takin an inbei niin a sawi bawk.
Taliban-te hian United States, UK leh ram dang an thawhpuite nena kum 20 zet an awmchilh hnuah an chhuahsan mek laiin hma an la mek.
Ram dang sipai la awm mekte pawhin September 11-ah chuan an chhuahsan vek tawh dawn a, Afghan sipai kutah venhimna thil chu a awm vek tawh ang.
Tual chhung mite chuan Taliban-te hian Qala-e-Naw tan in luhchilhin mi tang 400 chuang an chhuah a, an zinga mi 100 chuang chu an pawla mite an ni.
Tan in hi Afghan vanhim hna thawktute ven a ni a, inkahna thleng lovin an inpe nia hriat a ni.
Governor Hisamudin Shams chuan a chenna, Qala-e-Naw district-ah Taliban a hmuh thu leh intelligence service headquarters pawh hal a nih thu a sawi.
Taliban kutah khawpui a awm tawh nia sawi erawh governor hian a pha a, Afghan sipaiten an la venghim niin a sawi.
Taliban-ho hian tun hnaiah district eng emaw zat an la a, an ram pum hmun thuma thena hmun hnih vel chu an kutah a awm leh tawh a, ni tin hma an sawn bawk.