Pakistan-a chawlhkar hnih chhunga fur ruahtui sur nasa lutuk kaihhnawiha chhiarna thlengah naupang pariat telin mi 50 vel an thi tawh tih thuneituten an sawi.
“June 25 atang khan Pakistan ram chhung hmun hrang hrangah fur ruah kaihhnawih chhiatnaah mi 50vel thi an awm tawh,” tiin national disaster management thuneitu chuan Zirtawpni khan a sawi a, mi 87-in hliam an tuar bawk tih a sawi.
Thihna thlen tamna ber hi khawchhak lama Punjab province-ah a ni a, a tam ber chu electric-in a man leh in chim a ni.
Associated Press news agency chuan tual chhung thuneitute hnen atanga an dawn dan chuan thi hi mi 55 an ni tawh niin a tar lang ve thung.
Hmarthlang lama Khyber Pakhtunkhwa province-ah chuan Ningania Shangla-a lei minah naupang pariat, kum 12 leh 15 inkar ruang lak chhuah an ni tih emergency service Rescue 1122 thupuangtu, Bilal Ahmed Faizi chuan a sawi bawk.
Chhanchhuah hna thawktute chuan naupang dang pawh an la zawng zel niin an sawi bawk.
District emergency unit officer Sanaullah Khan chuan heng naupangte hi 15 vel niin cricket an khelhna bula an tawm chu an chhak atanga lung tlain a chhilh ta niin Reuters news agency hnenah a sawi.
Chhanchhuah hna hi Pakistani army bakah tual chhunga miten an pui a, ruang pariat an la chhuak tawh a, naupang pakhatin hliam a tuar a, him pawh an awm tih an sawi.
Pakistan-a khawpui lian ber pahnihna, Punjab province-a Lahore-ah chuan Nilaini khan ni khata ruah a sur tam ber ni tawngin khawlai chu luiah a chang a ni ringawt a, mi cheng zinga 35% dawnin electric leh tui an neih loh phah bawk.
Lahore-ah hian Nilaini atang khan mi 19 an thi tawh a, hengte hi in chim leh electric-in a mante an ni hlawm tih thuneitute chuan an sawi.
Pakistan-a weather forecast agency chuan ruah a la sur chhunzawm dawn a, Punjab-a lui lian, Jhelum leh Chenab chu la lian viau thei niin an sawi.
Province dangah pawh lui lian sawi a awm nual a, saberekakhuangkaih thleng thei a nih avangin mite fimkhur turin an inchah a. Punjab-a disaster management authority chuan Zirtawpni khan lui hnaiha hna thawkte chu hmun hima insawn turin an hriattir.