University of Newcastle, Australia chuan PhD zirlaite tan ‘Heavy Metal Geographies’ a hlui ta a, scholarship atan an ram pawisa $27,596 a dah nghal bawk.
Heavy Metal culture leh rimawi khawvel sukthleka a pawimawh dan te, nghawng a neih nat dan te bakah a tobul thlengin zir theih a ni ang a, Australia rama metal dinhmun te pawh hailan a ni dawn. He scholarship hi ramchhungmi leh rampawnmite tan a dil theih vek.
Metal degree nei tur chuan, khawvelpuma metal inlumleh dan te, Heavy Metal band te tobul, an dinchhuahna ram leh a chhehvel bakah society-a nghawng a neih dan te chu zirbing a ngai ang, tiin course kalphung tarlan a ni.
UK leh Australia ram te hian kawng enkima inzawmna leh inlaichinna an neih that ang bawkin, metal chungchangah pawh an inhnaih hle a, thenhran theih a ni lo. Australia rama heavy metal hmasawn dan leh band lar tak takte nunphung ngaihpawimawh a ni ang, tih an tarlang bawk.
He university-a director pakhat Simon Springer chuan, “Metal fan ruhkawl ka nihna ang bawkin, metal studies hi ka ngaipawimawhin, ka dah chungnung hle. Hengte hi zirchian a, zirbing tul tihna hi a rei tawh a, PhD zirlai ka nih lai phei kha chuan min nawr ut ut hman a, metal zirna mumal tak lo awm tur hi a lawmawm a, tuipui a, phurpui tlak a ni,” a ti.