Aizawl : Govt. Employee Group ‘D’ Association Mizoramin nimin khan Mamit-ah an pawl din champha an lawm a. Mamit Bawrhsap V.L. Remliana’n a telpui.
Mamit Bawrhsap chuan sorkar inrelbawl danah a bul thut atanga a ler thlengin pawimawh lo an awm lo tih sawiin, mahni hna chelh theuhte rinawm leh taima taka thawh chu a zahawm thu a sawi a. Office-a awlthawng leh inthlahdahte chu an nunin a chhiat phah thin nia sawiin, phur leh taima taka hna thawk turin Mamit district-a Group D te chu a chah.
Group D dinhmun chu sorkar hna inkhaidiat danah hnuaihnung deuh angin lang mahse, an dinhmun chang pha lo tam tak an awm tih inhriaa, sorkar dan te an hriata, sorkar mi an nih anga politics thilah te an inhnamhnawih loh a pawimawh thu Bawrhsap chuan a sawi a. Dikna leh rinawmna vawngnung zel turin a chah bawk.
Mizoram State Group ‘D’ Govt. Employees Association, Gen. Hqrs, Aizawl atanga he hun hmanpuitu an President Zothanpuia pawhin Mamita Group ‘D’ ten kum 70-na hial lawma pawl inpumkhat tha tak an ni chu lawmawm a tih thu a sawi a. Pawl tana theihtawp chhuah tur leh harsatna tawk an awm a nih pawha intanpuitawn zel turin a chah.
Mahni nihna haia hna thawk lo tur leh an dikna chanvote huaisen taka kengkawha sorkar tana rinawm taka hnathawk turin a chah bawk.