Aizawl: State Geological Programming Board thrutkhawm vawi 28-na chu nimin khan GAD Conference Hall-ah neih a ni a, Geology & Mining (DGM)-in 2022-2023 chhung khan sorkarah cheng vaibelchhe 12 chuang an chhunglut tih tarlan a ni.
Directorate of Geology & Mining leh Commerce & Industries Department bul tuma SGPB thrutkhawmah hian kum kalta 2022-2023 chhunga Geology & Mining leh Geological Survey of India(GSI), Tripura-Mizoram Circle hnathawh hrang hrangte tarlan a ni.
Sorkar kum liamta 2022-23 chhung khan Geology & Mining chuan sorkar sum bawmah lung leh balu atangin Non-Tax Revenue Rs. 10,89,67,804, Petroleum Exploration Licence Fee atanga an hmuh atangin Rs. 1,30,55,485 leh Laboratory Testing FeeRs Rs. 3,74,200 an chhunglut a, sorkar kum kalta chhunga sorkar sum bawma an chhunluh zawng zawng chu Rs.12,23,97,489 a tling a ni.
Thutkhawma an tarlan danin, kum 2022-23 chhung hian Mizoram Sorkar chuan DGM hnuaiah Chhim lam District Pali (4)-te enkawltu tur -Lunglei Zonal Office din phalna pein Post thar 13 a siam sak a. Dan thar pahnih(2):Draft – The Mizoram Minor Minerals (Concession & Prevention of Illegal Mining), Rules 2023 leh The District Mineral Foundation Rules of Mizoram, 2023 an siam chu Cabinet Meeting-in a lo passed sak tawh a, heng Dan-te hi Mizoram Legislative Assemby a lay-a passed a nih veleh hman theih a ni ang.
He thutkhawmah hian nikum lama SGPB Meeting neih taka Agenda-a passed tawh hmalakna-Action Taken Report (ATR) leh tun kum kal mek 2023-24 chhunga Work Plan te an sawiho bakah an rel tura chhawpchhuah agenda te sawihovin an pawm bawk a, thrutkhawmah hian District hrang hranga Deputy Commisioner-te an tel a ni.