Aizawl: MNF sorkara ninister ni thin, Siaha bialtu MLA Dr K Beichhua chuan BJP party zawm tura thuthlukna a siam thu a sawi.
The Zozam Times zawhna chhangin Dr K Beichhua chuan MNF party atanga hnawhchhuah a nih hnuah party dang atanga sawmna a dawn thu a sawi a, ngun taka angaihtuah hnuah Mara Autonomous District Council-a sorkar lai mek, BJP party chu zawm turin thuthlukna a siam ta tih a sawi a, BJP-ah hian member ni tura memrship fee pek nghal rum rum a tum rih lo va, tunah chuan BJP support phawta inthlanpui neih dawn hnaih-ah official taka BJP-a luh a tum thu a sawi.
Dr K Beichhua chuan amah thlawptu, a bial mipuite pawhin BJP-a luh loh chu kawng dang a awma an hriatpui loh thu leh a thuthlukna siam chu an pawmpui a beisei thu a sawi a, Siaha bialah hian BJP party ticket-a in candidate a tum thu te, MLA-a tling thei turin beiseina sang tak an neih thu a sawi.
MNF sorkara minister of state ni thin, Dr K Beichhua hian December 13 khan minister atanga bânna a thehlut a, chief minister-in ti tura a tih avanga bânna thehlut ta a nih thu thuthar thehdarhtute hmaah a lo sawi tawh a, January 25 khan MNF party atangin chawlhtir a ni leh ta a ni.