AZL: Zo-Reunification Organisation (ZORO) chuan Manipur-a Zohnahthlakte thlavang hauhna leh an tawrhna tawmpui nan punkhawm buatsaih an tum.
Manipur buaina avanga Zohnahthlak harsatna tawk mek chungchang sawiin nimin khan ZORO chuan executive committee meeting an nei a. Manipur-a Zofate tihchimih leh nuaibo tumna atanga dam khaw chhuak tura an beihnaah leh Manipur rorelna laka in la hrang tura India sorkar an ngen mek chu an thlawp tih an puang nawn leh tih an sawi.
ZORO chuan Manipur buaina avanga Zohnahthlakten nunna bakah in leh lo chân a, chenna leh ei leh in tur tlachham thahnem tak an awm chu na an tih thu leh an tawrhpui takzet thu an sawi a. Manipur-a Zohnahthlak unaute tawrhna an tuarpui zia leh nunna chânte sun nan Nilaini chhun dar 12 khian Vana pa Hall kawt-ah punkhawm buatsaih an tum a ni.
ZORO chuan Manipur Zohnahthlakte thlavang hauhna leh an tawrhna tawmpui nana punkhawm an buatsaih turah hian Zofa khawvel hmun hrang hrang a awmte a tam thei ang ber tel turin an sawm bawk.