Zirlai pawl pahnih. MZP leh MSU huaihawtin Mizoram Legislative Assembly secretariat-a hna lak sut phutin nimin khan Assembly House kawtah zirlaite an pungkhawm a, karleh lamah lungawi lohna an lantir chhunzawm dawn.
Zirlai rualte hi nimin zing dar 8:30 vel atang khan assembly house kawtah hian an pungkhawm tan a, he huna thusawitu, zirlai pawl hruaitute chuan tun hnaia assembly secretariat-in hna a lak 11 zinga mi pakuate chu assembly secretariat hotute vua leh vang an ni tih an sawi a, dik lo leh fel lo tak, induhsakna uchuak taka hnalak chu thuneituten an cancel lo a nih chuan assembly secretariat luhchhuah thlenga hmalak an tum thu an sawi.
Zirlai pungkhawmte chuan resolution pathum pawmin Mizoram Legislative Assembly secretariat hna lak chu cancel ni rawh se tih te, Assembly Recruitment Rules thar hnuaiah hnalak that ni rawh se tih leh, assembly hna lak chu sut a nih hma chuan hmalakna chhunzawm zel ni rawh se, an ti a ni.
Tun hnaia assembly hna lak sut tura pungkhawmte hi chawhma dar 11 velah an tin darh a, hemi hnu hian zirlai pawl hruaitute leh Chief Ninister Zoramthanga chu CM pisaah an inkawm a, zirlai pawl hruaitute chuan assembly house hna lak dan chungchanga an lungawi lohnate an sawi bakah Assembly Recruitment Rules chu a hlui tawh avangin en nawn ngai nia an hriat thute an thlen.
Chief minister chuan inhawng takin an thu thlente a ngaihthlaksak bakah assembly lama hotute pawh a lo biak tur thu hrilhin a tul anga hmalak a nih zel tur thu a sawi.
An thil phut chungchanga chief minister hova an thutkhawm hnu hian zirlai pawl pahnih hruaitute chu an kal zel dan tur relin MZP pisaah an thukhawm chhunzawm leh a, zirlai pawl duh dan anga he hna lak hi sut a nih hma chuan lungawi lohna lantir chhunzawm zel an rel a, kawng zawh leh total bandh thlenga hmalak an tum a. Thawhtanni zing dar 8:30-ah punkhawm neih leh tura ruahmanin, zirlaite leh thalai hna zawng mekte kal turin an sawm a ni.
Tar lan tawh angin tun hnaia Mizoram Legislative Assembly Secretariat-a hna hrang hrang – assistant, translator, UDC leh LDC laknaah induhsakna uchuak a awm nia ngaiin zirlai pawl pahnih MZP leh MSU-in hma anla zui ta a. Assembly Secretariat lam chuan he hna lakah hian thil dik lo a awm loh thu leh dan ang taka lak a nih thu an sawi thung a ni.