Real Madrid chuan kum 18 mi Turkey playmaker Arda Guler chu Fenerbahce atangin an lalut fel.
“Turkish Messi” ti a hminglem an vuah hial hian Santiago Bernabeu-ah kum ruk contract a ziak a. Mi tam takin tunhnai kum engemaw zah chhunga Turkey atanga player talent nei tha berah an ngai.
Season liamta khan Guler hian a club tan vawi 35 inkhelin goal ruk a khung bakah midang goal khung tur vawi sarih a siamsak a. Turkish Cup final-ah man of the match chawimawina a dawng.
Turkey tan vawi li inkhel tawhin thla hmasa khan an ram tana goal khung thei naupang ber a ni.
Kum 16 mi lek a nih a Fenerbahce tana khel thei Guler hian a club-ah hian Euro maktaduai 17.5 a leichhuah theihna a nei a. A club lamin an man an tel tam theih nan Real Madrid chu a release clause aia sang a lei turin a ngen a, hei vang hian Euro maktaduai 20 in Real hian an lei dawn a ni.