Mexico-a chanchinu lian bera thawk, correspondent chu a chin hriat lohva a awm reng hnuah khawthlang lam state, Nayarit-ah a ruang hmuh a ni.
Kum 59 mi, Luis Martín Sánchez Íñiguez hi La Jornada-a thawk niin Nilaini atang khan a bo a ni.
A thihna hi a hna thawh vang ni ngeia ngaih a ni a, an ram hi chanchinbu mite tana ram him lo ber pakhat a ni.
Sánchez-a pawh hi he state-a thun hnaia chanchinbu mi ruk bo pathum zinga pakhat a ni.
A ruang hi Inrinni khan Tepic khawpui bul, El Ahuacate khuaah hmuh a nih thu public prosecutor pisa chuan a puang a. A hma ni chiah khan a nupuiin a bo tih a report a ni.
A awmah thuchah pahnih lo bel a ni a; mahse, thuneitute chuan heng thuchah hi engnge tih an sawi lo.
Sánchez-a hi a ruang an hmuh hma darkar 24 leh 48 inkara thah nia ngaih a ni.
A bo ni hian zirtirtu leh reporter hlui pakhat chu an hna an kal tur an bo ve chiah bawk a. Tun thleng pakhat zawk, Osiris tia an sawi hi a chin hriat a la ni lo.
Mi dang, Jonathan-a erawh chu zawn a nih hnuah Zirtawpni khan dama hmuh a ni a, ‘a hriselna dinhmun pawh a tha’ niin thuneituten an sawi.
Sánchez-a thihna hi Mexico bakah ram dang atang pawhina n dem hle a. Mexican Commission for the Defense & Promotion of Human Rights chuan eng nge a chunga thleng tih puang turin thuneitute an ti.
“Mexican chanchinbu mi tan dikna kan duh!” tiin an pawl hian social media-ah an tar lang.
Committee to Protect Journalists Americas branch pawhin chanchinbu mi thahna chu an dem tak zet tih an sawi.