India hmar lam hmun tam taka ni hnih liam ta chhunga fur ruahtui tam tak tla avanga chhiatna hrang hrang thlengah mi 12 vel an thi tawh.
Weather office chuan ni rei vak lo chhung ruah hi a la sur chhunzawm dawn niin an sawi bawk.
Indian Metrological Department (IMD) chuan Delhi, Haryana, Himachal Pradesh, Uttarakhand, Rajasthan, Punjab leh Jammu & Kashmir-ah te ruah tam tak a la sur dawn niin an sawi a ni.
IMD chuan khawthlang lam atanga ruahtui pai thli kalin India hmar lam a thleng niin an sawi a, hei hian Inrinni atang khan ruah surtirin Delhi-ah pawh a sur a, tun fura ruah an dawn tam hmasak ber a ni.
Ram khawpui berah hian khawlai hmun tam takah tui tam tak a tlin avangin lirthei kal vel pawh a buai phah hle a. Darkar 24 lek chhungin ruah mm 153 zet a sur hman a, kum 1982 hnua July thlaa ni khata ruah a sur tam ber tum a ni hial.
Delhi-ah hian Pathianniah pawh khan ruah tam tak a la sur chhunzawm a. Gurugram-ah chuan khawlaiah tui a tling nasa a, power a awm loh phah bawk.
Delhi-a nu kum 58 mi chu chu a chenna in (flat) chung zar (ceiling) tlain a delh avangin an thi a, Rajasthan-ah ruah sur nasa kaihhnawihah mi pali an thi bawk.
Uttar Pradesh-a Muzaffarnagar-ah nu leh a fa kum ruk mi chu Pathianni zing khan ruah sur nasa lutuk avanga an in chimah an thi a. Himachal Pradesh-a Shimla khawpuiah hetiang bawk hian mi pathum an thi bawk.
Jammu & Kashmir-ah pawh Inrinni khan Poonch district-ah sabereka khuangkaihin sipai pahnih a la a, an thi ve ve.
IMD chuan Rajasthan-ah hian district pakua – Rajsamand, Jalore, Pali, Ajmer, Alwar, Banswara, Bharatpur, Bhilwara, Bundi, Chittorgarh, Dausa, Dhaulpur, Jaipur leh Kota-ah te ruah tam tak a la sur dawn niin an sawi lawk.
Kum tina neih thin, Amarnath Yatra pawh ruah sur nasa leh lei min avangin ni thum chhung chawlh lailawk a ni tawh a. Inrinnia lei minin a hnawh avangin Srinagar- Jammu Highway-ah lirthei 3,000 chuang tangkhang an awm mek.
Chhim lamah pawh Kerala leh Karnataka hmun tam takah ruah a tam hle bawk a. IMD chuan Kerala-a district pali – Kozhikode, Wayanad, Kannur leh Kasaragod-ah inralrinna, yellow alert a tichhuak.
Weather office hian Himachal Pradesh district pasarihah red alert a tichhuak bawk a. Hengte hi Shimla, Sirmaur, Lahaul, Spiti, Chamba leh Solan-ah niin lei min leh sabereka khuangkaihin kawng tam tak a danchah hnuah a ni.
Kullu district-a national highway chu Beas lui lianin a la a, hei vang hian kal theih a la ni lo va, lui hi a la lian chhunzawm zel bawk.
Haryana leh Punjab-ah pawh ruah tam tak a sur a, hei hian khaw lum lutuk pawh tiziaawmin boruak a dai tawh niin weather office chuan an sawi a. Khawpui an intawm, Chandigarh-ah chuan Pathianni nileng khan ruah a sur a ni.