Kan ram kaihhruaina hi state kan nih hnuah party lian pahnih MNF leh Congress in sawrkar chhawkna hnuaiah kan la awm char char a. Thil tih fuh loh tam tak an nei thin a. Thil tam takah pawh kan ram tan hian hna pawh an lo thawk tawh bawk. Chhuanawm thama hmalakna pawh an lo nei ve ve tawh thin. Anmahni leh anmahni pawh insawiselin nasa takin an inbei thin. Ram tan hian an rilru pawh an lo seng nasa tawh thin hle. An thil tih that pawh hi sawi sen loh a awm ang. Kan ram tana MNF in Assam rifles ram la heka secretariat ropui tak a han din te, mipui hman tangkai em em ZMC leh Lengpui airport Congress sawrkarin an han siamte hi chhuanawm tham zinga mi a ni ngei ang.
Amaherawhchu mipui duhthusam hi chu a awm thei ngai lova. Tunhnaiah tu ten emaw MNF ni lo, Congress ni lo sawrkar kan neih a ngai a ni tiin ZPM an rawn din ta a. Mipui ngaihdan pawh an kaihruai viau mai. A bik takin thalai lam.phei chuan an bawh hle niin a lang. Mahse, party hlun leh inkaihhruaina mumal lo na na na chu an din chhoh tirh atangin hotu invuahkhawm karah neuh neuh a awm nia sawi a awm nghal a. Chu chuan mi thinlungah rin chat ngam party ni lo a hriatna a tuh tel ta tlat mai. A hotuten an inkarah engmah lungrual lohna a awm lo a ni han ti thin mahse, mipui thinlunga rinhlelhna hamda chuan a tuam tlat a. An hotute han en in politics a mithar an lo ni hlawm lem lo bawk si. Hma an han sawn viau a. Khawi khawiah emaw chuan hma pawh an sawn rualin tunhnai khan an chhungkuaa boruak mipui rinhlelh ruk deuh thin chu a puakchhuak ta fo mai. An party hotu PAC member hial, rorelna sang chung chang thu leh hla pawh hre pha chin ni ngeia hriat chuan an inlungrual loh ruk dan a sawichhuak ta piap piap mai a. An party tan chuan accident tawk hial an ni ta in a lang. An kuta sawrkarna han hlan mai ngam a ni meuh dawn em tih chu politics thlir uluk ho thlir dan niin a lang ta.
Hetih lai hian kum 5 liam ta a mipui hnawl Congress lam tan la chho hian awmzia an nei dawn emaw ni aw tih theihin boruak a awm a. Sawrkar phung leh experience tam tak nei Pu Lalnunmawia Chuaungo IAS (Rtd) leh media lama mi langsar Pu Vanneihthanga te, Journalist Senior Remruata Renthlei te hialin Congress an zawm thut mai hian mipui a barakhaih niin a lang a. Engpawh nise, mipui hian experience nei tam tawh MNF leh Congress hi an buk leh mai dawn niin a lang ta.