Aizawl: Finance department chuan Manipur atanga sahimna zawnga Mizorama raltlante enkawla chhawmdawlna atan Rs. vaibelchhe 5 a ruahman mek.
Home department hotute hnen atanga thudawn danin Chief Minister Zoramthanga’n sorkar laipui hnena Manipur mi Mizorama raltlan awm mekte tana Rs. vaibelchhe 10 a dil chu pek chhuah a la ni lo va. Pek chhuah thuai a nih beisei a ni chungin tunah an mamawh tawh em avangin Rs. vaibelchhe 5 hi finance department-ah dil a ni a. Department hian a pe chhuak hnai nia an hriat thu an sawi a, finance department hian sum hi a ruahman tawh a, hman phalna ‘administrative approval’ leh ‘expenditure sanction’ tifel tura buaipui mek a ni.
Hetih lai hian minister, MLA leh Mizoram sorkar hnuaia officer-te bakah sorkar laipui pisa a thawkte leh bank-a thawkte hnenah vehbur khawn mek zel a ni a. Eng chen nge Manipur buaina leh tharum thawhna hian a awh dawn hriat a nih loh avangin Executive Committee on Internally Displaced Persons of Manipur in Mizoram chuan vehbur hi a khawn ta a. Thahnemngai taka thawh turin a ngen a ni.