MNF Media & Publicity department hruaituten Inrinni khan Aizawl Press Club-ah thu thar thehdarhtute kawmin, MNF party-in hma a sawn mek zel lai hian eptu party pahnih, Congress leh ZPM te chu an chhungkua an buai tak zet a, an party bansan an intihhmuh nasa hle niin an sawi.
MNF Media & Publicity General Secretary VL Krosshnehzova chuan tun hnaiah Congress party chu an Treasurer Zodintluanga Ralte, MLA in a nihna a bansan a, a hnuah an PAC member leh minister hlui, KS Thanga pawhin party atanga banna a theh lut a. A banna theh luhah hian sawi hlawh tak sum inpek chungchang sawi lan a nih thu a sawi.
Congress chu an president Lalsawta’n duh bik leh thlan bik a nei tih sawiin VL Krosshnehzova chuan, “An president duh bik leh thlan bik ni lo tan Congress-ah hmun a awm meuh lo. Tuna hruaitu lian tak tak Congress party-a la awm hram hramte pawh hi MLA ticket chang lo tur chiang sa te an ni hlawm a. Nakuma an inthlan huna an President Pu Lalsawta paih theih a nih beiseia a der maia la Congress hram hramte an ni. Congress leh an hruaitu tharah mipuiten beisei a nei tawh lo,” a ti.
VL Krosshnehzova chuan ZPM party chu an hotute-ah inrem lohna leh ngaihdan inan lohna a nasa tih sawiin, “An hotuten duhsak hrang theuh an neih avangin an duhsak zawng theuh haivur nan an party danpui (constitution) meuh pawh an mahni ngeiin an bawhchhe duh a ni. Mahni party chhung pawh rel fel thei lo, mahni dan siam ngei pawh mahni ngeiin bawhchhe duh hian rorelna fel an kalpui lovang tih a chiang hle,” tiin, an nihna kalsan chuang lova hming thar invuah, chinghne beram vun sin ang vel an ni tih a sawi.
ZPM chu mi tha leh thawkrimte aiin mi lar leh hausa, sum thawh hnem theite chawi vulin bial peah puhin VL Krosshnehzova chuan, “Hetiang a nih avang hian ZPM chu an kehdarh ta mek a,” tiin, Mizoram chhim lam bakah Zoram hmun dangah ZPM atangin an bang chum chum tih a sawi a. ZPM chu an party hruaitu lawk tak tak te mai bakah an rorelna sang ber dawttu Political Affairs Committee pahnih laiin banna an theh lut tih a sawi.
Eptu party te an buai mek lai hian MNF party chuan hmasawnna duhawm tak a nei mek zel niin VL Krosshnehzova chuan a sawi a. Congress, ZPM leh BJP-a beidawngte hnam party-ah an haw khawm mek zel a. Heti taka MNF party-in bawh a hlawh hi Chief Minister Zoramthanga kaihhruai MNF sorkarah mipuiin rinna an nghahzia a lang chiang hle niin a sawi bawk.
Zawhna chhangin VL Krosshnehzova chuan tun dinhmunah chuan an party-ah chhungkaw buaina a awm lem loh thu a sawi a. Kumin inthlan lo awm turah candidate an puan hunah pawh MNF chuan buaina an neih a rin loh thu sawiin, “MLA ni mek zingah pawh ticket chan loh avanga party-a lungawi lo an awm a nih pawhin, a buai tur chu anmahni chauh a ni,” a ti.