French champion Paris Saint-Germain chuan an midfield tichak turin Sporting Lisbon atangin midfielder Manuel Ugarte chu Euro maktaduai 60 in an lalut.
Kum 22 mi Uruguay international hian kum nga contract a ziak a, Parc des Princes-ah hian kum 2028 June thleng a khel ang.
Chelsea, Tottenham leh Liverpool te nen pawh a sawizawm player hian, “Hetiang ang club lian takah ka football hun a bung thar ka kai thei tur hi ka lawm tak zet. PSG tan hian ka theihtawp ka chhuah ang.” tiin a sawi.
Uruguay tana vawi 8 khel tawh Ugarte hi PSG in tun nipui chhunga player an lakluh pathumna a ni a. Paris khaw club hian kumin atang an kalphung tidanglam in star player ngawr ngawr aiin an manager thar Luis Enrique hnuaia team tha an din theihna tur player an dap.
Ugarte hian kum 2020 khan an ram club Fenix atangin Portugal a pan a, kum 2021 khan Sporting-ah hian insawnin an tan vawi 85 a inkhel tawh a. Defensive midfielder rinrawl a ni.
Paris Saint-Germain hian tun nipuiah attacking midfielder Marco Asensioleh defender Milan Skriniar te chu Real Madrid leh Inter Milan atangin free transfer in an lalut tawh.
Ligue 1 champion lai hian Inrinni khan South Korea international Lee Kang-in chu Real Mallorca atangin an lalut fel bawk.
Kum 22 mi hian Paris-ah hian kum nga contract a ziak a, Mallorca tana season hnih a khelh hnuah France a pan.
“Paris Saint-Germain ka zawm thei hi ka tan chuan thil ropui tak a ni. Tunlaia khawvel club lian zing ami an ni a, khawvela player ropuite khelh a ni. Ka zinkawng thara bul tan hi ka nghakhlel tawh hle.” tiin a sawi.
South Korea tana vawi 19 khel tawh playmaker tangkai hi kum 2022 World Cup-ah pawh khan an team a mi pawimawh a ni a. Khelmual chhungah veilam leh dinglam sir tawnah khel thei ve ve in attacking midfielder ang pawn chhawr thin a ni.
Kum 10 mi a nihin Spanish club Valencia academy a zawm a, an tan senior match 62 khelin Mallorca tan match 73 atangin goal 7 leh assist 10 a nei bawk.