UFC featherweight champion Alexander Volkanovski chuan 145 pound huang a thunun chhunzawm a, amah chotu interim champion Yair Rodriguez nen inhmachhawn in round thumnaah technical knockout in a chak.
Las Vegas a UFC 290-ah Mexican fighter Rodriguez hian Volkanovski lakah chan tha zawk chan a chang hleithei lova. Round thumnaah a lu ah pet thawiin a hnek fuh zui a, hei hi a tihbuai teuh ber a ni.
Nimahsela Australian fighter in khawih let zuiin chhuatah a ti tlu a, hnek zuiin hnehna a chang.
Kum 34 mi Volkanovski hian kum 2019 a Max Holloway hneha champion a nih hnuah vawi nga a title a humhimna a ni.
“145 pound lalpa hi ka ni a, tumahin min dang thei lo.” tiin a chak hnuah a sawi.
“Yair hmachhawn chuan beisei tur a hriat loh. Hei hi tupawhin kan hria, fighter hlauhawm a nih avangin zuam chi a ni lo.” tiin a khingpui a fak.
A hmabak a tum a neihte sawi leh bawkin, “Ka banah hliam ka neih avangin zai ka ngai. Mahse lightweight champion nih ka duh a, chuvangin ka lo kir anga, lightweight champion ka ni dawn. Min lo thlir reng rawh u.” tiin a sawi.
Flyweight lal thar
UFC a division hmuhnawm ber pawl flyweight champion zawnnaah bout hmuhnawm dang a thleng leh a. Champion lai Brandon Moreno leh amah chotu Alexandre Pantoja ten round nga chhunga title an inchuh a hmuhnawm.
26-5 MMA record neitu Pantoja in split decision in round nga an inhmachhawn hnuah hnehna a chang a. 125 pound champion thar a ni.
Pantoja leh Moreno te hi profesional MMA-ah vawi hnih an intumna niin niin Pantoja hi a chak vawi hnihna a ni a. Kum 2016 khan “The Ultimate Fighter”-ah intum tawhin Pantoja tho a chak a, hei erawh professional record a chhiar tel a ni lo.
“Moreno hian hma a sawn hle. Zanina ka hmachhawn ang kha ka beisei lo. Mahse champion tur hian ka bei nasa a, tunhnai kum hnih chhungin engkim ka hlan a ni.” tiin Pantoja chuan a sawi.
Bout dang
Middleweight champion Israel Adesanya hmachhawn thei turin Dricus du Plessis chuan hnehna a chang a. Champion hlui Robert Whittaker chu round hnihnaah technical knockout in a hneh.
20-2 record nei Du Plessis hi a zawna vawi 8 a chakna a ni a. Adesanya nen hian inhmachhawn ngei tura ngaih an ni a. A chak hnu hian champion lai nen hian cage chhungah an incho.
Welterweight champion hlui, khawvela MMA fighter ropui ber zing ami Robbie Lawler chuan a chawlhna tur bout-ah hnehna a chang a. Professional MMA a a bout hnuhnung ber ni turah Niko Price chu second 38 chhungin a knockout.