Apple supplier Foxconn chu Indian mining giant Vedanta nena $ tluklehdingawn 19.5 hu chip siamna tur hmun din an tumna atangin a inhnukdawk.
Kum khat pawh la liam lovah khan company pahnih hian Prime Minister Narendra Modi-a chawr chhuahna, Gujarat-ah thil siamna hmun an din tur thu an lo puang tawh a ni.
Mi thiamte chuan he thil hi India-in technology industry lama tum a neih tikhawlhkhamtu a ni thei tih an sawi.
Hetih lai hian minister pakhat chuan India-in chip siamnaa tum a neih chu a tibuai dawn chuang lo niin a sawi ve thung.
Taiwan-a hmunpui nei, Foxconn hian, “Lehlam lehlam hian hmachhawp awm hi hmanhmawh taka kalpui turin a ti ta lo,” tiin thu an chhuah.
“A karah awlsam taka paltlang theih loh thil tam tak a awm a, he project nena inzawmna nei lem lo pawn lam thil a awm bawk,” an ti.
Thawhlehni khan Foxconn chuan BBC hnenah neitu nihna pumhlum neih zui tumtu, Vedanta nena inbe rema thil ti an nih thu a sawi bawk.
An company chuan India sorkarin ‘Make in India’ hnuaia tum a neih hlen tura a puih zel tur thu a sawi bawk.
New Delhi-a hmunpui nei, Vedanta chuan ‘India-a chip siamna hmun hmasa ber’ din turin mi dang an dap tih an sawi ve bawk.
Khawvel huap advisory firm Albright Stonebridge Group-a mi, Paul Triolo chuan, “Foxconn an inhnukdawk thut hi India-in semiconductor-a tum a neih mek tan chuan thil pawi tak a ni,” a ti.
Hetih lai hian Minister of State for Electronics & Information Technology Rajeev Chandrasekhar chuan Foxconn thutlukna hian ‘India-in semiconductor siam a tumnaah nghawng a nei dawn lo’ niin Twitter-ah a tar lang ve thung.
Chandrasekhar hian Foxconn leh Vedanta hi India tana ‘investor hlu tak’ an nih thu a sawi bawk.
Indian sorkar hian a ram chhunga chipmaking industry din tum hian hma a la a. Nikum khan $ tluklehdingawn 10 zet hmangin investor pawh a hmu a, hei hi ram dang atanga chip lak luh a tlem nana a tih a ni.
Prime Minister Modi-a’n a tlangaupui, ‘Make in India’ scheme hi kum 2014-a hawn kha niin India chu China el phak tura khawvela thil siamna hmuna chantir a tum a ni.
Tun hnaiah firm eng emaw zatin India-a semiconductor factory din turin inremna an lo siam tawh.
Thla hmasa khan US memory chip giant Micron chuan $ maktaduai 825 hu semiconductor assembly leh test facility dinna turin inremna an ziahpui.
Micron chuan an hmun thar tur hi Gujarat-ah kumin hian an sa tan dawn a. Hei hian thawh tur 5,000 vel siamin thawktu 15,000 chuang mamawh tura ngaih a ni.