Congress hruaitu leh party worker eng emaw zat chuan nimin khan Delhi-a petrol pump hrang hrangah tuialhthei man sang lutuk tihhniam phutna an lantir.
An hruaitu langsar zingah KC Venugopal leh Shakti Singh Gohil pawh telin sakawr tawlailir hmangin Feroz Shah Kotla Stadium petrol pump an pan.
Venugopal chuan UPA sorkar hnuaiah khan petrol leh diesel-a chhiah an lak chu Rs. 9.20 a nih laiin tunah chuan Rs. 32 a ni tawh tih a sawi.
“Sorkarin tuialhtheia chhiah a lak hi a titawp tur a ni. Tuialhthei man sang hi tihniam leh vat kan phut,” tiin Congress general secretary hian a sawi.
Rajinder Nagar leh Janpath-a petrol pump-ah Ajay Maken-a hovin duh lohna lantir a ni bawk.
Party hruaitute chuan ram chhung hmun hrang hranga petrol pump-ah COVID-19 tidarh lo tura dan zam zawm chungin tuialhthei man sang tihniam tura duhna hi an lantir tih an sawi.
Petrol leh diesel man hi nimin khan litre-ah pawisa 31 leh pawisa 28-ina to belh leh.
Petrol hi Delhi-ah Rs. 95.85 leh diesel Rs. 86.75 a ni tawh.
Petrol man hi Madhya Pradesh, Maharashtra, Andhra Pradesh, Telangana, Rajasthan leh Ladakh-ah chuan Rs. 100 chuang a ni tawh.
Sri Ganganagar district, Rajasthan chu ram chhunga tuialhthei man tona ber niin litre-ah petrol Rs. 106.94 leh diesel Rs. 99.80 man a ni.