Myanmar-a venhim hna thawktute chuan Bago khawpuia sipai sorkar duh lohna lantirtu mi 80 chuang an thah niin mihring dikna chanvo humhalhtute chuan an sawi.
Sipaite hian mi an thahte ruang hi an la vek nia sawi a ni a, thi zat hi chiang taka hriat a ni lo bawk.
Thil thleng hmututen tual chhung chanchinbute hnenah sipaite hian ralthuam lian tak tak an hmang a, che hlek apiang an kap niin an sawi.
February thla tira sipaiten mipui sorkar paih thlaa thuneihna an chan hnuah anmahni duh lohna lantirtu mi 600 chuang an that tawh.
Sipaite hian thuneihna an chan mek tihngheh nan tharum an hmang nasa hle.
Bago hi an khawpui lian ber, Yangon bul lawka mi a ni a, sipaiten mi an thah hi Zirtawpnia thleng a ni a, mi tam tak chu an khaw thenawmah an tlanchhiat phah.
Assistance Association for Political Prisoners (AAPP) chuan Myanmar ram buainaa thi hi tuna an hriat chin aia tam daih a nih an ring.
Myanmar Now chuan sipai duh lohna lantirna huaihawttu, Ye Htut hnen atanga an thu dawn tar langin, “Insuatna rapthlak tak ang a ni, an hmuh apiang an kap,” tiin sipai chet dan a sawi.
Myanmar-ah hian hmun hrang hrangah sipai sorkar duh lohna hi lantir zel a ni a, sipaite hian kum khat chhung emergency an puang.
Nikum kum tawpa inthlana Aung San Suu Kyi leh a kaihhruai, National League for Democracy (NLD) party-in hnehna an chan danah sipaite hi lawm lovin dik lo taka thil tih a awm niin an sawi a. Election commission erawh chuan chutiang a awm lo niin a sawi.
Zirtawpni khan MP nihna hlihsak leh UN-a Myanmar palaite chuan UN Security Council member-te chu sipaite chet dan dodal turin an ti a, hrekna na zawk kalpui tur leh an ram chunga thlawh phal lohna siam turin an ngen.
International Crisis Group senior adviser Richard Horsey pawhin sipaite chet dan thlir hian an ram chu kaihruaitu awm lo ang mai a nih theih thu a sawi.