India hmar lam state tam takah ruah nasa takin a sur chhunzawm zel a, ram khawpui berah pawh tui lian inralrinna tihchhuah a ni ta.
Ruah sur nasa kaihhnawiha chhiatna hrang hrang thlengah Inrinni atang khan mi 20 vel an thi tawh (thi zat sawi dan erawh a inang lo).
Zirtawpni thleng hian ruah a la sur chhunzawm dawn nia sawi lawk a ni a. State tam takah thingkung a tlu a, tuiin chenna a chim a, kawngpui lian tam tak lei minin a hnawh avang leh invenna atan khar a ni bawk.
Thawhlehni atang khan Delhi-ah pawh Yamuna tui chim chinin hlauhawm chhinchhiahna chung a chim phak tak avangin tui lian thei laka inralrinna sang ber khawn rik a ni tawh.
Thuneitute chuan lui kam hmun hniam laia khawsa sang chuang hmun him zawkah an sawn chhuak nghal.
Sawn chhuah ve loh, hmun hlauhawm tho laia chengte pawh a tul huna insaseng thei tura inring reng tura tih an ni bawk.
Yamuna chunga dawh lei eng emaw zat chu venthawn thila khar a ni a, sikul pawh a ni hnihna atan khar leh a ni bawk.
Delhi Chief Minister Arvind Kejriwal chuan ni hnih lo awm leh tur chu khawpui tan thil buaithlak tak a ni dawn niin a sawi a; mahse, a sorkar chu eng pawh hmachhawn tura a inpeih thu a sawi.
India-a weather department chuan Delhi leh a chhehvelah hian kartawp thleng hian ruah tam tawk tak a la sur dawn niin an sawi lawk a ni.
Himalaya tlangdunga awm, Himachal Pradesh leh Uttarakhand-ah pawh sipai leh National Disaster Response Force (NDRF) team-te chuan lei min leh sabereka khuangkaihin kawngpui leh chenna a tihchhiata tangte chhanchhuah hna an thawk mek zel bawk.
Himachal Pradesh-ah hian kawngpui 700 chuang zet chu lei min avangin khar a ni.
Rajasthan, Punjab leh Haryana-ah pawh ruah tam tak a sur avangin khawlaiah tui a tling nasa a, chet vel a buai phah hle.
Thlalak leh video thehdarhah pawh khawlaia lirthei tlan vel chu tuiin thuk tak thleng a chim tih a hmuh theih.
Hindu sakhaw biakzinten kum tina India-in a awp chin Kashmir huam chhung, Himalaya tlanga puk thianghlim an tlawh thin, Amarnath Yatra an tih pawh a kawngpui ber a chhiat avangin ni li chhung khar a ni ta a, biakzina kal sang tel an tangkhang mek.
India-ah hian kum tin fur lai, June leh September inkarah hian ruah a tam thin a, hei hi a ram pum ang chuan nunna hnar pakhat a nih rualin chhiatna a thlen nasa a, nunna chân pawh an tam hle thin.
Tun hnaiah India-ah hian sik leh sa uchuak tak tak a thleng zing hle a, India hmar lam pawh hi ruah a sur chiam hma lawk hian khaw lum uchuak takin a lo tuam tawh.
Sik leh sa lama mi thiamte chuan sik leh sa uchuak tak takte hi khawvel lum zel nghawng pakhat nia ngaih a ni.