Aizawl : Samagra Shiksha 2020-21 fund Rs. nuai 327.432 senga sak DIET Lunglei Academic building thar chu nimin khan School Education Minister Lalchhandama Ralte-in a hawng.
Education Minister chuan DIET Lunglei Academic building thar tha tak neih theihna tura theihtawp chhuahtu School Education deptt. official-te leh a sak hna thawktu Allied Concern te lawmthu a hrilh.
Mizoramah zirnain hma a sawn zel theihna turin School Education department chuan nasa takin tan a lak mek zel thu sawiin National Education Policy (NEP), 2020 in a duan angin school a zirna chu a bulthut atanga siamthat hna thawh mek a nih thu Minister chuan a sawi a. SCERT hmalaknain elementary education tihhmasawnna turin Early Childhood Care and Education (ECCE) lamah theihtawp chhuah niin, textbook leh syllabus te pawh siamthat mek a nih thu a sawi.
Zirlai thangtharte pawhin Mizo hnam ziarang leh history te tun aia an hmelhriat zawk theih nan school textbook-te pawh siamrem chhoh zel a nih thu a sawi a. Government Adhoc Aided School te upgradation tur chungchangah pawh School Education department chuan hma a lak mek thu Minister chuan a sawi.
Mizorama zirna siamtha tur chuan zirtirtute training-na hmunpui DIET-ah bul tan a tul thu sawiin, Minister chuan DIET Lunglei Academic building thar chuan an hnathawhna leh an zirnaah te nghawng tha tak a neih ngei a beisei thu a sawi a.
Mizoram DIET pariat awm mek te bakah DIET Hnahthial leh Khawzawl te pawh ruahman tum mek a nih thu a sawi bawk.
DIET Lunglei Academic building thar hi Samagra Shiksha 2020-21 fund Rs. nuai 327.432 senga sak niin, Allied Concern-in a sak hna an thawk a. February ni 23, 2022 ah hna tanin, June ni 22, 2023 ah an zo a ni.