Chelsea striker Romelu Lukaku chu Inter Milan in tun nipuiah a nghet a lakluh ngei an duh.
Kum 30 mi Belgium striker hian season liamta khan loan in Inter-ah hian Chelsea atangin a khel a. An tan match 37 khelin goal 14 a khung.
Inter hi Manchester United nen goalkeeper Andre Onana chungchangah an indawr mek a, hei vang hian Inter Milan in Lukaku hi San Siro a la kir leh turin sum lamah harsatna an neih loh an inring.
Chelsea hian Lukaku manah hian Pound maktaduai 40 vel an beisei nia ngaih a ni a. Inter in Onana manah hian Pound maktaduai 50 vel an beisei thung. Hetihlai hian United hian Onana man atana Inter in an chhiar hi a sang lutuk niin an ngai a, indawrna erawh an kalpui mek.
Chelsea hian karlehah pre-season inbuatsaihna atan United States an pan dawn a, heta Mauricio Pochettino-a’n a squad hruai turah a tel ve dawn em tih hriat a la ni lo.
Inter Milan hian kum 2019 nipui khan Manchester United atangin Lukaku hi club chanchin a player manto ber ni turin Euro maktaduai 80 in an lalut a. An hnenah match 95 khel hmanin goal 64 a khung a. Chelsea in Pound maktaduai 97.5 sengin an lalut leh a, mahse Premier League game 16 bak a khel lo.