India hmar lam, Rajasthan-a Jaipur khawpuiah Pathianni khan tek tla avangin mi 16 vel an thi a, mi eng emaw zatin hliam an tuar bawk.
Heng mite hi kum zabi 12-na laia sak tawh kulh, khualzin hiptu tak ni bawk, Amer Fort an tiha ralven bula an awm laiin mahnia thla inlak (selfie) an tum chu tek hian a deng a ni.
Uttar Pradesh leh Madhya Pradesh-ah pawh tekin mi eng emaw zat a deng hlum bawk.
India-ah hian kum tin mi 2,000 vel tekin a deng hlum ziah angin sorkar chuan a chhinchhiah.
Police officer pakhat chuan chanchinbute hnenah fort ralven buka tekin a den hlumte hi thalai tete an nih hlawm thu a sawi.
Ralven bukah hian mi 27 an awm a, thenkhat chu tekin a den rual hian leiah an zuang thla.
Rajasthan-ah hian Pathianni ringawtah khan mi dang pakua chu tekin a deng hlum bawk tih tual chhung chanchinbute chuan an tar lang.
Uttar Pradesh-ah pawh a tam zawk hmeichhia leh naupang, mi 41 chu tekin a deng hlum bawk a. Hmun khata a tamna ber chu tuna Prayagraj an tih tak, Allahabad khawpuiah niin mi 14 an thi.
Firozabad khawpuiah thingkung hnuaia biru mipa pahnih chu tekin a deng hlum bawk a. Mi dangte hi district hrang hranga mite an ni.
Madhya Pradesh-ah pawh mi pasarih an thi a. Mi thiamte chuan heng state pahnihah hian miin lo leh in sakna lamah pawna hna an thawh nasat thin avangin tek tla avanga thi hi an tam thin tih an sawi.
Uttar Pradesh leh Rajasthan chief minister leh Prime Minister Narendra Modi chuan an chhungte hnenah zangnadawmna pek a nih tur thu an pang.
India-ah hian June leh September inkar hi fur hun lai a ni.
Indian Meteorological Department (IMD) chuan kum 1960 chho vela tek tla aiin kuminah hian a letin a tam zawk tih an sawi a, hei hi sik leh sa inthlak nasat vangah an puh.
Tek tla hi 1990 chho vel aiin 30%-40% velin a tam tawh zawk niin an sawi bawk a. Kum 2018 khan chhim lama Andhra Pradesh-ah darkar 13 chhung lekin tek vawi 36,749 a tla a. Nikum June thla pawh khan state pahnihah tek tla kaihhnawihah mi 100 chuang an thi.
Thuneitute chuan ram ngaw thatna hmunah tek tla avanga chhiatna hi a tam zual thin tih an sawi.